Коррупцияга қарши кураш: Украинада вилоят ҳарбий комиссарлари ишдан олиняпти

^{Фото: president.gov.ua}

Украина Миллий хавфсизлик ва мудофаа кенгаши (МХМК) барча вилоят ҳарбий комиссарларни ишдан бўшатиш тўғрисида қарор қабул қилди. Бу ҳақда 11 август, жума куни президент Володимир Зеленский Миллий хавфсизлик ва мудофаа кенгашининг ҳудудий ишга қабул қилиш ва ижтимоий қўллаб-қувватлаш марказлари (ҲИҚ) аудити натижаларини кўриб чиққан навбатдан ташқари йиғилиши якунида маълум қилди. «Бизнинг қарорларимиз. Барча вилоят ҳарбий комиссарларини ишдан бўшатамиз. Бу тизимни уруш нима эканини ҳамда уруш пайтида порахўрлик ватанга хиёнат эканини аниқ биладиган одамлар бошқариши керак», деб таъкидлади Зеленский.

«СБУ» текшируви кутилмоқда

Унга кўра, вилоят ҳарбий комиссарликлари бошлиғи лавозимига «фронтдан қайтган ёки жароҳати туфайли фронтда бўла олмаган, лекин ўз қадр-қимматини сақлаб қолган жангчилар тайинланиши керак – ушбу ишга ёллаш тизими айнан уларга ишониб топширилиши мумкин».

Қарорни Украина Қуролли кучлари бош қўмондони Валерий Залужний амалга оширади. «ҲИҚнинг янги раҳбарлари тайинланишидан олдин «СБУ» томонидан текширувдан ўтказилади», — дея қўшимча қилди Зеленский.

ДТБ: 112 та жиноят иши қўзғатилди

Давлат тергов бюроси (ДТБ) маълумотларига кўра, 8 август ҳолатига кўра, Украина ҳарбий рўйхатга олиш ва комиссарликларида коррупцияга қарши кураш бўйича умуммиллий кампания доирасида 112 та жиноий иш қўзғатилган.

Шу тариқа, Украина бош прокурори маълумотларига кўра, Одесса вилоятининг собиқ ҳарбий комиссари Евгений Борисовнинг оила аъзолари 2022 йил февраль ойидан буён Испанияда умумий қиймати 151 миллион гривнадан (3,7 млн евро) ортиқ бўлган кўчмас мулк сотиб олган. Тергов версиясига кўра, Борисов хизмат қилиш муддатини кечиктириш, сафарбарликдан озод қилиш ва мамлакатни тарк этишга рухсат берувчи ҳужжатлар билан савдо қилган. Борисов ишдан бўшатилгандан сўнг, Зеленский Украина минтақаларидаги барча ҳарбий комиссарларни текшириш учун комиссия тузишни буюрди.

Ўн бешта айблов хулосаси судга юборилган

ДТБ иши натижасида 15 та айблов хулосаси судга юборилди. Шу тариқа, Запорижжяда ўз атрофидагиларни бойитиш схемасини тузган ва жиноий элементларнинг суддан яширинишига ёрдам берган ҳарбий комиссар фош қилинди, дея маълумот берди маҳкама. Карпатортида ДТБ ҳарбий комиссар аскарларни уй қуришга мажбур қилганини аниқлади. Киев вилоятида ҲИҚ ходими чегарани ноқонуний кесиб ўтишга ёрдам берганликда гумонланяпти.

Еврокомиссия аввалроқ, июн ойида, Брюсселга кўра, Украина ҳукуматининг коррупцияга қарши курашда қўшимча чоралар кўриш истагидан далолат берувчи «мол-мулк декларацияси тўғрисидаги янги қонун»ни олқишлаган эди.

Янгиликлар