Bloomberg: Европада «олтин виза» бизнеси гулламоқда

^{Иллюстратив фото}

АҚШнинг Bloomberg нашрига кўра, кўҳна қитъада инвестиция эвазига яшаш ҳуқуқини берувчи «олтин виза» бизнеси борган сари ривожланиб бормоқда. Ваҳоланки, ЕИ бундай кўринишда фуқаролик бериш шартлари мураккаб бўлишини маълум қилган.

2011-19 йиллар оралиғида инвестиция ҳисобига 132 минг одам ЕИ давлатларида фуқаролик олган. Бу жараён уй-жой нархини ошириб юборгани ва назорат кучсизлиги ортидан сиёсий резонанс келтириб чиқарганди. Европарламент ва Европа комиссияси ЕИ давлатларидан «олтин виза» бериш дастурларини ёпишни сўраган. Британия ва Ирландия аллақачон виза беришни тўхтатган.

Аммо Европанинг бошқа давлатларида «олтин виза»лар мўмай даромад келтиришда давом этмоқда. Масалан, охирги ойларда Греция ва Португалияда виза олиш ҳолатлари кўпайган. Испания ва Италияда эса «олтин виза»га талаб рекорд даражада ошиб кетган.

«Олтин виза» нима?

Европа Иттифоқи аъзоларида ушбу давлатга инвестиция киритиш ёки маълум нархга мол-мулк сотиб олиш эвазига яшаш ҳуқуқи ёки фуқаролик бериш тартиби мавжуд. Барча давлатларда бу борада ўз талаблари бор. Масалан, баъзи давлатлар мамлакат ҳудудида камида бир йил яшаганларгагина бундай ҳуқуқни беради.

Афтидан, давлатлар ЕИ сиёсатчилари талабига қарамай бундай кўринишдаги «иссиқ пул»дан воз кечмоқчи эмас. Масалан, Португалия июл ойида мамлакатда кўчмас мулк сотиб олиш эвазига яшаш ҳуқуқини бериш дастурини бекор қилди. Аммо истаган одам Португалиядаги кўчмас мулк билан шуғулланмайдиган ҳар қандай компания ёки фондга камида 500 минг евро инвестиция киритиш орқали мамлакатда яшаш ҳуқуқини қўлга киритиши мумкин.

Нидерлания «олтин виза» учун аризаларни қабул қилишда давом этмоқда. Ваҳоланки, мамлакат бундай дастурдан воз кечганини эълон қилган. Бундай ҳолат Черногорияда ҳам кузатилмоқда. Испания эса виза тартибини эмас, уни олиш учун талаб қилинадиган миқдорни ўзгартирмоқчи. Яъни Испания «олтин виза»сини олиш энди 500 минг эмас, 1 миллион евро бўлиши мумкин.

Кипрда «олтин виза» тартиби бироз ўзгарди, лекин тўлиқ эмас. Гап шундаки, аввал инвесторнинг оила аъзолари ҳам яшаш ҳуқуқини қўлга киритарди, ҳозир бу имкон фақат пул тўлаган одамга тақдим этилади. Болгария эса 2021 йилда ёпилган «олтин виза» тартибини яна қайта очганини эълон қилди.

Малта ҳам Греция каби «олтин виза» нархини ошириш орқали ўзига хос «ислоҳот» қилди. Аммо Еврокомиссия бу талаб етарли эмаслигини айтиб, кўпчилик фуқаролигини олишга қизиқадиган Малтадан бу тартибни бекор қилишни сўрамоқда.

Янгиликлар