Пашинян: “Хавфсизлик борасида Россияга қарамлигимиз стратегик хато эди”

Арманистон бош вазири Никол Пашинян Россияни Қорабоғ аҳолиси хавфсизлигини таъминлаш бўйича ўз мажбуриятларини бажармаётганликда айблади. Бу ҳақда Deutsche Welle хабар берди.

Арманистон, Озарбайжон ва Россия ўртасида 2020 йилда ҳарбий ҳаракатлар тугаганидан кейин тузилган келишувларга кўра, россиялик тинчликпарвар кучлар Лочин йўлагини назорат қилиши керак. Аммо Пашинянга кўра, бу амалга ошмаяпти.

“Нега? Иккита сабаб бўлиши мумкин: ё Россия Лочин йўлаги устидан назоратни сақлаб қола олмайди ёки хоҳламайди. Ҳар иккиси ҳам, биз учун муаммоли”, — деди у.

Пашиняннинг сўзларига кўра, Россия Ғарб давлатларини Арманистон ҳукуматини ҳудуддан “Россияни сиқиб чиқаришга қаратилган чора-тадбирларни кўришга” ундаётганликда айблайди, лекин аслида “Россиянинг ўзи ҳудудни тарк этмоқда”.

Арманистон бош вазири, “бир кун келиб уйғонганимизда, Россия бу ерда йўқлигини кўрамиз”, деган фикрни илгари сурди. Шунингдек, у мамлакатнинг хавфсизлик соҳасида Россияга қарамлигини стратегик хато деб атади.

“Арманистоннинг хавфсизлик архитектураси 99,999 фоиз Россия билан боғлиқ эди, шу жумладан, қурол ва ўқ-дориларни қўлга киритиш борасида. Бироқ бугунги кунда, Россиянинг ўзи қурол ва ўқ-дориларга муҳтож бўлган бир вазиятда, Россия хоҳласа ҳам, Арманистоннинг хавфсизлик эҳтиёжларини таъминлай олмаслиги аниқ. Яъни, бу мисол хавфсизлик соҳасида фақат бир жойга боғлиқ бўлиш ўз-ўзидан стратегик хато эканини кўрсатади”, — таъкидлади Пашинян.

Янгиликлар