Перуда бойларни камбағаллардан ажратиб турувчи “уят девори” бузилмоқда (фото, видео)

Перу пойтахти Лимадаги ҳашаматли уйларни қашшоқликда яшовчи қўшни жамоалардан ажратиб турувчи 4,5 километрлик “уят девори” қарийб қирқ йил ўтиб бузиб ташланмоқда. Бу ҳақда Reuters хабар берди.

Баландлиги уч метргача бўлган ва тиканли симлар билан ҳимояланган девор тупроқ йўллардаги хавфли турар жойларда яшовчи одамларни асфалтланган йўллардаги бадавлат уйлари ва ҳашаматли қасрлари бўлган одамлардан ажратиб туради.

Тенгсизлик рамзига айланган девор тўрт йиллик суд курашидан сўнг мамлакат конституциявий суди қарори туфайли бузила бошланди.

“Бу бепул транзитга таъсир қилади, лекин қўшниларнинг қадр-қимматига путур етказади. Бу иккита ижтимоий гуруҳни ажратиб турадиган бўлиниш”, — дейди жараённи назорат қилаётган суд магистри Густаво Гутиeррез.

Деворнинг биринчи қисми 1980 йилларда бадавлат Ла Молина туманини Перуда террорчи ташкилот сифатида кўриладиган “Shining Path” (“Ёрқин йўл”) партизан гуруҳидан ҳимоя қилиш баҳонасида қурилган.

Бироқ гуруҳ мағлубиятидан сўнг, девор 2000 йилларда “ноқонуний ер эгаллаб олишнинг олдини олиш” мақсадида кенгайтирилган.

Перуда 1980 ва 1990 йилларда пойтахтга кўчиш Лима атрофидаги тепаликларда оммавий жойлашишга олиб келди.

“Бу дискриминация девори. Перуликларни ижтимоий табақаларга бўлишимиз мумкин эмас. Буни қабул қилиб бўлмайди ва дунёнинг бошқа ҳеч бир жойида бундай ҳолат кузатилмайди”, — деди Гутиeррез.