177
Охирги маълумотларга кўра, Марокаш марказида содир бўлган зилзила қурбонлари камида 632 кишига етди, 329 киши жароҳатланган, деб ёзмоқда Al-Arabiya. Аввалроқ 296 киши ҳалок бўлгани ҳақида хабар берилганди. Ёрдам етказиш қийин бўлган тоғли ҳудудларда кўп одамлар ҳалок бўлди, деди маҳаллий амалдор.
9 сентябрга ўтар кечаси Марракеш шаҳридан 80 километр узоқликдаги тоғли ҳудудда 7,2 магнитудали зилзила содир бўлди, деб хабар берди Марокаш Миллий геофизика институти. АҚШ Геология хизмати эса зилзила магнитудаси 6,8 га баҳолангани ва ер силкинишлари нисбатан саёз — 18,5 километр чуқурликда содир бўлганини маълум қилди. Ички ишлар вазирлиги маълумотларига кўра, зилзила Ал-Ҳауз, Уарзазат, Марракеш, Азилал, Шихауа ва Тарудант провинцияларида сезилган.
Зилзила эпимарказига энг яқин жойлашган йирик шаҳар Марракешда турар жой бинолари ва бошқа иншоотлар қулаб тушди. Аҳолининг хабар беришича, UNESCO’нинг Бутунжаҳон мероси рўйхатига киритилган эски шаҳарда ҳам уйлар қулаган. Маҳаллий телевидение масжид вайрон бўлганини ва машиналар мажақланиб кетганини кўрсатди. Қутқарув хизматлари вайроналарни тозалашда давом этмоқда.
Зилзиладан жабр кўрган ҳудудларда мобил алоқа ва электр таъминотида муаммолар юзага келган.
Ҳиндистон ва Европа Иттифоқи расмийлари Марокашга ёрдам кўрсатишга тайёрлигини маълум қилди.
22:11, 8-05-2025
