АҚШ 5 америкаликни озод қилиш эвазига Эроннинг нефт даромадларини қайтарди

^{Фото: Reuters}

АҚШ Эроннинг музлатилган 6 миллиард долларлик нефт даромадларини қайтарди. Шунингдек, Эроннинг беш нафар фуқаросига қўйилган федерал айбловни олиб ташлади. Эвазига Эрон Американинг беш нафар фуқаросини озод қилди.

The New York Times хабарига кўра, АҚШ Эронга тегишли бўлган ва музлатиб қўйилган 6 миллиард доллар миқдоридаги нефт даромадларини Жанубий Кореядан Қатардаги банкка ўтказиб берган.

АҚШ президенти Жо Байден ёрдамчилари сўзларига кўра, Эрон қатъий молиявий санкциялар ва назорат остида, шу сабабли, қайтарилган маблағни озиқ-овқат, дори-дармон ва бошқа гуманитар товарлардан бошқа нарсага сарфлай олмайди. Аммо улар ушбу келишув Эрон томонидан бу товарларга сарфлаётган пулларни «озод қилиши» мумкинлигини тан олишади.

Битим шартлари республикачиларнинг кескин танқидига сабаб бўлган, улар Байденни Эроннинг бутун дунё бўйлаб «террорчилик фаолиятини молиялаштиришда» ёрдам беришда айблаган. Шу билан бирга, Байден маъмурияти Эрон билан келишув беш америкаликни озод қилишнинг ягона йўли эканини айтган.

Келиб чиқиши эронлик бўлган АҚШ фуқаролари Эронда асоссиз равишда жосусликда айбланиб, қамоққа ташланган эди. Теҳрон уларни 6 миллиард долларни қайтариш бўйича мураккаб жараён тугагунига қадар уй қамоғида ушлаб турди.

Аввалроқ, АҚШ Россияда ҳибсга олинган америкаликлар – собиқ денгиз аскари Пол Уилан ва журналист Эван Гершковични озод қилиш учун Россияга нисбатан санкцияларни юмшатмоқчи экани ҳақида хабарлар тарқалган эди.

2022 йил апрел ойида Оқ уй Россияда 2019 йилдан бери ушлаб турилган америкалик Тревор Риднинг озод этилишини таъминлади.

Янгиликлар