Туркия бутун мамлакат бўйлаб кенг кўламли аксилтеррор операциясини бошлади

^{Фото: AP}

Туркия хавфсизлик кучлари бутун мамлакат бўйлаб «Қаҳрамонлар» деб номланган кенг кўламли аксилтеррор операциясини ўтказмоқда. Бу ҳақда Туркия Ички ишлар вазирлиги раҳбари Али Ерлиқоя ижтимоий тармоқда маълум қилди.

Унинг айтишича, Мерсин, Ван, Шонлиурфа, Мардин ва Ойдинда террорчилик ташкилоти аъзолигида гумон қилинган 12 нафар шахс қўлга олинган. Курдистон ишчилар партияси (КИП) билан алоқадорликда гумонланганлар ҳам ушланмоқда.

Вазир сўзларига кўра, эрталаб соат 8:30 ҳолатига кўра Туркия 13440 нафар хавфсизлик ходими иштирокида 466 та аксилтеррор операцияси ўтказган.

Диёрбақир, Ғозиантеп, Истанбул, Бурса, Ботмон, Денизли, Адана, Қайсери, Анталия, Кўнё, Испарта ва Кожаэлида камида 55 нафар «террорчиликда гумонланган шахс» ҳибсга олинган.

Май ойида Туркия Ички ишлар вазирлигининг аксилтеррор бўлими ҳакерларга қарши ўтказган операцияси доирасида 32 кишини қўлга олган эди. Қайд қилинишича, улар 10 мингта веб-сайтга киберҳужум уюштиришни режалаштирган, шундан 450 таси мамлакат давлат идораларига тегишли.

1 октябр куни Туркия Ички ишлар вазирлигининг Анқарадаги бош хавфсизлик бошқармаси яқинида теракт содир этилди. Масъулиятни КИП аъзолари ўз зиммасига олган эди.

Янгиликлар