Фото: Global Look Press

AFP ва CBS News хабарларига кўра, чет эл фуқаролигига эга юзлаб одамлар Рафаҳ назорат пункти орқали Ғазо—Миср чегарасини кесиб ўтди.

CBS қайд этишича, Рафаҳ назорат-ўтказиш пунктидан биринчи ўринда жангларда яраланган фаластинликларни олиб кетаётган бир неча ўнлаб тез ёрдам машиналари ўтказилган. Шу билан бирга, Ғазо секторида бўлиб турган америкалик Сюзан Бесеисо телеканалга америкаликлар ҳали ўтказиб юборилмаганини айтди.

“Америка элчихонаси ва давлат департаменти чегарага яқинлашганимиздан ва тўрт марта бомбардимон қилинганимиздан бери биз билан алоқага чиқмади. Улар бизни олиб чиқиш учун ҳеч нарса қилгани йўқ”, — деди Бесеисо.

The New York Times газетасининг ёзишича, аввалроқ Ғазо Ички ишлар вазирлиги ҳудудни тарк этиши мумкин бўлган 500 дан ортиқ хорижий паспорт эгалари рўйхатини эълон қилган. AFP хабарига кўра, хорижликларнинг биринчи гуруҳи, асосан аёллар ва болалар аллақачон Мисрга етиб борган.

Сўнгги маълумотларга кўра, Ғазо секторида Исроилнинг зарбалари оқибатида ҳалок бўлганлар сони 8 796 кишини ташкил этади, 22 мингдан ортиқ киши жароҳат олган. Исроилда эса ҲАМАСнинг зарбаларидан 1,4 мингдан ортиқ одам ҳалок бўлди, 5,4 минг киши жароҳатланди.

ҲАМАС ва Исроил ўртасидаги уруш бошланганидан бери Ғазо секторининг 1,5 миллионга яқин аҳолиси уйларини тарк этишга мажбур бўлди, деб хабар бермоқда БМТ. Анклавда озиқ-овқат ва асосий эҳтиёжлар тақчиллиги тобора кучайиб бормоқда. Сектор аҳолисининг аксарияти шимолий ҳудудлардан жанубга, Миср билан чегарага қочиб кетишган.

Рафаҳ — Ғазо аҳолисига гуманитар ёрдам кўрсатиш учун очилган ягона назорат-ўтказиш пункти. 31 октябрда Миср назорат пунктига танклар ва бошқа зирҳли техникаларни жойлаштирди. Бунгача Қоҳира узоқ вақтдан бери сектордан фаластинлик қочқинларни қабул қилишдан бош тортган эди.