Владимир Путин Россия Жамоатчилик палатаси аъзолари ва минтақавий жамоат палаталари раислари билан учрашди ва дунёдаги сўнгги воқеалар тўғрисида ўз фикрлари билан ўртоқлашди. Meduza унинг нутқидан қисқа иқтибослар келтирди.
Александр Невский Ўрдага борган, Ғарбнинг босқинига самарали қаршилик кўрсатиш учун Ўрда хонларига таъзим қилган. Чунки Ўрда ўзини беадаб тутган бўлса-да, тилимизга, урф-одатларимизга, маданиятимизга тегмаган. Ғарб босқинчилари эса даъво қилган. Айнан шу танлови учун биз Невскийни авлиё сифатида ҳурмат қиламиз.
Россия империяси таркибида Украина йўқ эди. Совет даврида Украина асосан рус ерлари ҳисобига шакллантирилди, аммо охир-оқибат улар рус халқи туб аҳоли эмаслигини эълон қилишди. Бу ўта ноқонуний. Параллел равишда улар Донбассда русларни йўқ қилишни бошладилар.
Агар биз қардош Украина билан нормал муносабатларга эга бўлганимизда, Қрим билан боғлиқ ҳаракатларни ҳеч ким ўйламас эди. Аммо одамларни бу фашист газандаларидан ҳимоя қилиш керак эди. Кейинчалик Донбасс ва Новороссияда ҳам худди шундай бўлди.
Ушбу ҳудудларнинг Россия Федерацияси таркибига кириши силлиқ, табиий бўлиши ва одамлар натижаларни имкон қадар тезроқ ҳис қилиши учун ҳамма нарсани бажаришимиз керак. Янги ҳудудлар биз учун янги эмас, улар бизнинг тарихий ҳудудларимиз. Россиянинг махсус операцияни бошлашдан ўзга иложи йўқ эди. Махсус операция бошланганида Россия аллақачон ҳужумга учраган ва бунга жавобан автоматларни қўлга олишга тўғри келди.
Украинадагидек коррупция даражаси ҳеч қаерда йўқ. Украинада ҳамма нарса сотиб олинади ва сотилади. Айтишларича, Яқин Шарқда Украина қуроллари пайдо бўлмоқда. Албатта пайдо бўлади, чунки сотилмоқда. «Толибон»га ҳам сотишмоқда. Америкаликлар Украина коррупциясини енга олмаяпти, чунки коррупция у ерда амалда қонунийлаштирилган. Қўшма Штатлар у ерда элитани ўзгартиришни режалаштирган эди, аммо ҳеч нарсага эриша олмадилар.
Маҳачқалъа воқеаларига келсак. Бу биз Россия қонунларига мувофиқ эътибор беришимиз ва жавоб беришимиз керак бўлган воқеалардир. Ва биз буни қиламиз. Ғазодаги даҳшатлар фонида учқун чиқариш осон [антисемит қирғинини қўзғатиш учун]. Қийналаётган болаларга қарасангиз, муштингиз тугилади. Бу ҳар қандай оддий одамнинг реакцияси. Агар шундай бўлмаса, демак бу тошбағир одам. Шу билан бирга, биз бу воқеаларни ақл билан идрок этишимиз, ёвузлик илдизи қаерда эканини тушунишимиз керак. Ва бу [тартибсизликларга чақириқлар] чет элда, шу жумладан Украинада яшовчи одамлар томонидан қилинган.
Шу муносабат билан, мен хориждаги арбобларнинг позициясидан ҳайратда қолдим: улар Исроил яҳудийларини қўллаб-қувватламоқда ва уларнинг Украинадаги агентлари ёрдамида мамлакатимизда яҳудий қирғинини уюштиришга ҳаракат қилмоқда. Ажабланарли даражада жирканч. Ақл бовар қилмайди. Улар ўз манфаатларини кўзлайди. Бунда манфаат — Россияга қарши курашиш ва мамлакатни ичкаридан ларзага келтириш.
“Замин” янгиликларини “Telegram”да кузатиб боринг
