ЕИ ва АҚШ Ғазо секторида ўт очиш тўхтатилганини олқишлади

^{Фото: Picture Alliance}

Европа Иттифоқи Ғазо секторида вақтинчалик ўт очишни тўхтатиш режими амал қила бошлаганини олқишлайди. KNA агентлигининг хабар беришича, бу ҳақда 24 ноябр, жума куни кечқурун Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел маълум қилган. У Исроил ва ҲАМАС ҳаракати ўртасидаги келишувни «даҳшатли гуманитар вазият»га барҳам бериш йўлидаги биринчи қадам деб атади ва фаластинлик жангчиларни «ҳаёти бўйича савдолашмасдан» Ғазо секторида ушлаб турган барча гаровга олинганларни озод қилишга чақирди.

Боррел, шунингдек, Европа Иттифоқи мамлакатлари, араб давлатлари ва Исроилни бирлаштирган «Ўрта Ер денгизи учун иттифоқ» халқаро ташкилоти саммитида Ғазо секторидаги вазиятни ҳал этиш муҳокама қилинишини билдирди. Ушбу саммит 27-28 ноябр кунлари Барселонада бўлиб ўтади. Саммитда Ғазо секторидаги вазият муҳокамасига Иордания ташқи ишлар вазири Айман ал-Сафадий бошчилик қилади.

Шу билан бирга, ЕИ дипломатияси раҳбари яна бир бор Яқин Шарқ можаросини «икки давлат» схемаси, яъни мустақил Фаластин давлатини яратиш бўйича ҳал этиш тарафдори эканини айтди. Жозеп Боррелл исроилликлар ва фаластинликларни «икки халқ манфаати учун зўравонликларнинг пастга силжишини қайтаришга» чақирди.

Шолц ва Байден ҳам вақтинчалик сулҳни олқишлади

Германия канцлери Олаф Шолц ҳам Ғазо секторида вақтинчалик ўт очишни тўхтатиш ва ҲАМАС томонидан гаровга олинганларнинг биринчи гуруҳи озод қилинганини олқишлади. «Бу яхши янгилик, - деди у X ижтимоий тармоғида. - Биз бу одамлар ва уларнинг қариндошлари сўнгги бир неча ҳафта ичида нималарни бошдан кечирганини тасаввур қила олмаймиз».

Шу билан бирга, Германия ҳукумати раҳбари, худди Боррел сингари, Ғазо секторида асир қолишда давом этаётган яна 200 дан ортиқ одамни озод қилишга чақирди: «Бугун фақат бошланиши бўлиши мумкин, ҲАМАС барча гаровдагиларни сўзсиз озод қилиши керак».

АҚШ президенти Жо Байден ҳам худди шундай муносабат билдирди. Шунингдек, у Ғазо секторида вақтинчалик сулҳни узайтириш учун «ҳақиқий имкониятлар» борлигини айтди. Боррел сингари, Байден ҳам можаронинг «икки давлат» ечими тарафдори.

Сулҳнинг биринчи куни 39 фаластинлик озод қилинди

ҲАМАС жангчилари вақтинчалик ўт очишни тўхтатиш доирасида жума куни 13 нафар исроиллик аёл ва бола ҳамда 11 нафар хорижлик – 10 нафар таиландлик ва бир филиппинликни асирликдан озод қилди. Бунга жавобан Исроил қамоқхоналарида сақланаётган 39 нафар фаластинлик аёл ва вояга етмаганлар озодликка чиқди.

24 ноябрда бошланган сулҳ тўрт кун давом этиши кўзда тутилган. Бу вақт ичида гаровга олинган 50 нафар исроиллик ва 150 нафар фаластинлик маҳбус озод этилиши керак. Бундан ташқари, шартлар қаторига Исроил авиациясининг Ғазо сектори устидаги парвозларини кунига олти соатга тўхтатиб туриш, ҳар куни инсонпарварлик ёрдами ва дори-дармонлар бўлган 200 та юк машинаси, шунингдек, ёнилғи солинган тўртта юк машинасининг ҳудудга ўтиши киради. The Times of Israel нашрининг ёзишича, сулҳ биринчи кунида инсонпарварлик ёрдамини етказиб бериш шартлари бажарилган.

Исроил-Фаластин можароси

7 октябр куни эрталаб ҲАМАСнинг ҳарбий қаноти - «Иззаддин ал-Қассам бригадалари» Исроилга қарши «Ал-Ақсо тўфони» операцияси бошланганини эълон қилди. Ғазо секторидан Исроил томон минглаб ракеталар отилди, қуролли гуруҳлар Исроил аҳоли пунктларига кирди.

ҲАМАСнинг билдиришича, операция босиб олинган Шарқий Қуддусдаги Ал-Ақсо масжидига бостириб кириш ва исроиллик муҳожирларнинг фаластинликларга нисбатан зўравонлиги кучайиб бораётганига жавобан амалга оширилган.

Бунга жавобан Исроил армияси Ғазо секторида ҲАМАСга қарши ўнлаб қирувчи самолётлардан фойдаланган ҳолда «Темир қиличлар» операцияси бошланганини эълон қилди.

Исроил-Фаластин можароси авж олгандан бери 14 мингдан ортиқ фаластинлик ҳалок бўлди. Исроилда қурбонлар сони 1400 дан ошади. Ғазонинг 2,3 миллион аҳолиси Исроилнинг ҳаводан оммавий бомбардимон қилиши ва эксклавнинг тўлиқ блокадаси туфайли озиқ-овқат, сув ва дори-дармонлар танқислигидан азият чекмоқда.

Янгиликлар