РФ президенти Владимир Путин Финландия «НАТОга тортилиши»дан олдин Россияда бу мамлакат билан ҳеч қандай муаммо бўлмаганини айтди.
«Бизда Финландия билан қандайдир баҳслар бўлганмиди? Барча баҳслар, жумладан ҳудудий хусусиятдаги мунозаралар XX аср ўрталаридаёқ ҳал этилганди.
Ҳеч қандай муаммо йўқ эди. Энди бўлади. Чунки энди биз Ленинград ҳарбий округини ташкил этамиз ва у ерга маълум миқдордаги ҳарбий бўлинмаларни тўплаймиз. Бу уларга нега керак эди, бу шунчаки қандайдир бемаънилик», – деган Путин журналист Павел Зарубиннинг «Россия-1» телеканалидаги «Москва. Кремл. Путин» дастурига берган интервюсида.
У АҚШ президенти Жо Байденнинг агар «Путин Украинада тўхтатилмаса», РФ НАТОга ҳужум қилиши мумкинлиги ҳақидаги баёноти юзасидан ҳам фикр билдирган.
«Бу мутлақо бемаънилик. Ўйлайманки, президент Байден буни тушунади. Бу шунчаки унинг Россия йўналишидаги нотўғри сиёсатини оқлаш учун айтилган гап», – деган у.
Путин Россия НАТО мамлакатлари билан жанг қилишдан манфаатдор эмаслигини қайд этган.
«Исталган йирик мамлакатнинг, НАТО аъзосининг, айниқса НАТОнинг ягона хўжайини бўлган мамлакатнинг президенти Россияда НАТО мамлакатлари билан жанг қилиш учун на геосиёсий, на иқтисодий ва на ҳарбий сабаблар ва манфаатлар борлигини тушунмаслиги мумкин эмас. Бизда улар билан ўзаро ҳудудий даъволаримиз йўқ, улар билан муносабатни бузиш истаги ҳам», – деган у.
Унинг сўзларига кўра, аксинча, Россия бу мамлакатлар билан муносабатларни ривожлантиришдан манфаатдор.
Путин РФда алянс аъзолари билан ҳеч қандай муаммо бўлмагани, Россиядек рақобатчи керак бўлмагани туфайли бу муаммолар сунъий яратилганини таъкидлаган.
- Финландия шу йил 4 апрел куни НАТО аъзосига айланганди. Мамлакат Шимолий Атлантика алянсига аъзо бўлиш учун аризани 2022 йил февралида Россия Украинага бостириб киришидан кўп вақт ўтмай топширганди. Бунга қадар Финландия ўнлаб йиллар мобайнида сақланиб келган бетарафлик мақомидан воз кечишни режалаштирмаётганди.
