Япония Шимолий Кореяни кузатиш учун янги сунъий йўлдош учирди (видео)

^{Фото: Kyodo News}

Япониянинг Mitsubishi Heavy Industries корпорацияси Шимолий Корея ракеталари парвозини кузатиш ва табиий офатлардан етказилган зарарни баҳолаш учун янги Optical-8 разведка сунъий йўлдошини учирди. Бу ҳақда “ТАСС” хабар берди.

Сунъий йўлдош Кагосима жануби-ғарбий префектурасидаги Танегасима космодромидан учирилган. Аппарат 2018 йилда учирилган худди шундай Optical 6 сунъий йўлдоши ўрнини эгаллаши керак, чунки унинг ишлаш муддати тез орада тугайди.

2023 йил январь ойида Mitsubishi Heavy Industries худди шу сериядаги Радар 7 сунъий йўлдошини орбитага олиб чиққанди. Optical 8 H-2А ракета ташувчиси ёрдамида ишга туширилган. Бу унинг 48 марта ишга туширилиши, жами 50 та шундай миссия режалаштирилган, шундан сўнг унинг ўрнини H3 ракета ташувчиси эгаллайди.

Япония 1998 йилда Шимолий Корея “Тепходон-1” ракетасини учиргач, разведка сунъий йўлдошларини учириш бўйича давлат дастурини бошлади.