Туркия парламенти бош ассамблеяси 23 январ, сешанба куни Швециянинг НАТОга аъзолиги ҳақидаги протоколни ратификация қилиш учун овоз берди. 287 нафар туркиялик парламентарий ратификацияни ёқлаб чиқди, яна 55 нафари эса қарши бўлди. «Бугун биз НАТОнинг тўлақонли аъзоси бўлишга бир қадам яқинлашдик», дея Швеция бош вазири Улф Кристерссон Анқарада овоз бериш натижаларига изоҳ берди.
Швециянинг НАТОга йўли
Швеция ва Финландия Россиянинг Украинага ҳужуми муносабати билан 2022 йилда НАТОга аъзо бўлиш учун ариза топширган. Финландия расман 2023 йил 4 апрелда Шимолий Атлантика алянсига аъзо бўлди. Швециянинг НАТОга қабул қилиниши ҳозиргача икки давлат - Туркия ва Венгрия томонидан маъқулланмаган.
Туркия Стокҳолм аризасини маъқуллашдан бош тортди, чунки у Швецияни Анқара террорчи деб ҳисоблаган курд фаолларини қўллаб-қувватлашда айблади. Швеция, ўз навбатида, сиёсатини қатъийлаштириб, Анқара шартларини бажарганини даъво қилмоқда. Узоқ давом этган музокаралар ва шартларни муҳокама қилишдан сўнг Туркия президенти Ражаб Тоййиб Эрдўған Швеция аризасини Туркия парламентига кўриб чиқиш учун топшириб, ушбу ҳужжатни имзолади.
Венгрия - Швециянинг аризасини маъқулламаган ягона давлат
Будапешт Швециянинг НАТОга аъзолик протоколини ратификация қилишдан тийилишда давом этмоқда, у Скандинавия давлатини Венгрияни «таҳқирлаш» сиёсатида айблаб, унинг қонун устуворлигига риоя қилмаётганини мунтазам танқид қилмоқда. Венгрия бош вазири Виктор Орбан ўтган йили «Венгрия ижобий ечимга тайёргарлик кўришдан олдин Швециядан ҳурмат талаб қилиш ҳуқуқига эга», деди.
Бу йил у швед ҳамкасби Улф Кристерссонни у билан Швеция таклифини муҳокама қилиш учун Будапештга таклиф қилди. Бунга жавобан Швеция ташқи ишлар вазири Тобиас Билстрём унинг мамлакати Венгрия билан Шимолий Атлантика алянсига қўшилиш бўйича музокара олиб боришга асос йўқлигини айтди. 2022 йил ёзида Мадридда ўтган иттифоқ саммитида Венгрия Швецияга ҳеч қандай шартсиз НАТОга аъзо бўлиш таклифини расман топширди, деб эслатди Билстрём. «Шунинг учун мен бугун музокаралар олиб бориш учун ҳеч қандай сабаб кўрмаяпман», деди у.
“Замин” янгиликларини “Telegram”да кузатиб боринг
