Пентагон раҳбари Америка халқидан шифохонага ётқизилган ҳолати учун узр сўради

^{Фото: Reuters}
Пентагон раҳбари Ллойд Остин йил бошида шифохонага ётқизилгани ҳақида кеч хабар берилгани учун жавобгарликни ўз зиммасига тўлиқ олишини айтди ва бунинг учун АҚШ президенти Жо Байдендан кечирим сўради.

«Мен президент Байдендан кечирим сўрадим. Мен унга жиддий ташхисим ва даволанишим тўғрисида дарҳол хабар бермаганимдан чуқур афсусда эканимни айтдим. У самимий ва илтифот билан жавоб бериб, менга тўлиқ ишонишини таъкидлади», деди Остин.

«Мен аниқ айтаман, биз нотўғри иш қилдик, мен нотўғри қилдим. Мен ўз ташхисим ҳақида президентга, ҳамкасбларим ва Америка жамоатчилигига хабар беришим керак эди. Мен жавобгарликни тўлиқ ўз зиммамга оламан ва бунинг учун ҳамкасбларим ва Америка халқидан узр сўрайман», деб қўшимча қилди у.

Шу билан бирга, Пентагон раҳбари департамент раҳбарияти учун ҳеч қандай хавф бўлмаганини таъкидлади: «Ҳар дақиқада мен ёки ўринбосарим ўз вазифаларимизни тўлиқ бажардик».

Декабр ойи бошида Остинга простата саратони ташхиси қўйилди ва 22 декабрда минимал жарроҳлик амалиёти, простатектомиядан ўтди.

Бироқ 1 январ куни Пентагон раҳбари кучли оғриқлар билан шифохонага ётқизилди, унга сийдик йўллари инфекцияси ташхиси ҳам қўйилди.

Шу билан бирга, Мудофаа вазири бир неча кун давомида АҚШ маъмуриятини шифохонага ётқизилгани ҳақида хабардор қилмаган: Оқ уйга 4 январгача Мудофаа вазирлиги раҳбари шифохонага ётқизилгани ҳақида хабар берилмаган. Бу эса кўплаб сиёсатчиларнинг эътирозига сабаб бўлди.

Кейинчалик Остин баёнот бериб, АҚШ маъмуриятини хабардор қилмасдан хатога йўл қўйганини тан олди. 29 январ куни Остин Пентагондаги иш жойига қайтгани маълум бўлди. “Замин” янгиликларини “Telegram”да кузатиб боринг