БМТ ҳисоботи: “Ал-Қоида” Афғонистонда “Толибон” билан алоқаларни давом эттирмоқда

^{Фото: Aamaj news}
Бирлашган Миллатлар Ташкилоти Хавфсизлик кенгаши сўнгги ҳисоботида “Толибон” “Ал-Қоида” билан алоқаларини сақлаб қолгани ва “Ал-Қоида” Афғонистонда саккизта янги ўқув маркази ташкил этгани ҳақида маълум қилди.

Хавфсизлик кенгаши ҳисоботида Афғонистоннинг Ғазни, Лағмон, Парвон ва Урузгон вилоятларида “Ал-Қоида”нинг тўртта лагери ташкил этилгани, террорчи ташкилот Панжширда ҳам қурол-яроғ омборини очгани айтилади.

Ушбу ҳисоботга кўра, “Ал-Қоида” аъзоси Ҳаким ал-Масри Афғонистоннинг Кунар вилоятида “Покистон Толибони” аъзолари учун бошпана тайёрлаш ва худкушлик ҳужумларини ўргатиш билан шуғулланади. Ҳисобот давомида, шунингдек, “Толибон” ва “Ал-Қоида” ўртасидаги алоқалар ҳалигача яқин экани, бу гуруҳ Афғонистонда “Толибон” назорати остида “барқарор” режимда ўзини сақлаб қолишга муваффақ бўлгани айтилди.

БМТ Хавфсизлик кенгашининг таъкидлашича, “Толибон”нинг “Ал-Қоида” фаолиятини чеклашга уринишлари “Толибон” ва бу гуруҳ ўртасида келишмовчиликларга олиб келган.

Бироқ ҳисоботда айтилишича, “Ал-Қоида”нинг Афғонистонда қолган аъзолари кенг кўламли ҳужумларни режалаштириш ва уюштиришга қодир эмас. “Ал-Қоида”нинг Афғонистонда “Толибон” билан тарихан яқин бўлган юқори мартабали раҳбарлари сони ўндан кам. Ҳисоботда 6 нафар “Ал-Қоида” аъзоси қолганларга қўшилиш учун Шарқий Афғонистонга кўчирилгани ҳам билдирилди.

Хавфсизлик кенгаши, шунингдек, Афғонистоннинг Лағмон, Кунар, Нангарҳор, Нуристон ва Парвон вилоятларида “Ал-Қоида”нинг бешта мадрасаси фаолият юритаётганини ёзган.

Бошқа томондан, ҳисоботда “Покистон Толибони”нинг бир қанча ҳужумлари Афғонистон ичидан қўллаб-қувватлангани, уларнинг айрим қўмондонлари “Толибон”дан ёрдам олаётгани айтилади.

Хавфсизлик кенгашининг қўшимча қилишича, “Ал-Қоида” “Покистон Толибони”ни жиҳоз ва қурол-яроғ билан таъминлашдан ташқари, гуруҳ кучларини хорижда амалиётлар ўтказишга ўргатишда ҳам ёрдам берган. “Замин” янгиликларини “Telegram”да кузатиб боринг