ХЖС прокуратураси Ғазо секторидаги эҳтимолий жиноятларни тергов қилади

^{Фото: Reuters}
Халқаро жиноий суди (ХЖС) прокурори Карим Хоннинг айтишича, прокуратура Исроилнинг Фаластин ҳудудидаги (Ғазо сектори ва Ғарбий Соҳилда) эҳтимолий жиноятларини Рим статутига мувофиқ фаол равишда тергов қилмоқда.

Рим статутига кўра, ХЖС геноцид, инсониятга қарши жиноятлар, уруш жиноятлари ва тинчликка қарши жиноятлар тергови бўйича юрисдикцияга эга. Давлатлар иштирокидаги ишларни кўриб чиқадиган Халқаро суддан фарқли ўлароқ, ХЖС уруш жиноятлари ёки инсониятга қарши жиноятларда айбланган шахсларга қарши ишларни ҳам кўради.

«Барча урушларнинг қоидалари бор ва қуролли можароларга нисбатан қўлланиладиган қонунлар уларни бўш ёки маъносиз қиладиган тарзда талқин этилмаслиги керак. Бу менинг ўзгармас позициям. Ўтган йили Рамаллоҳдаги (Иорданиянинг Ғарбий соҳилидаги шаҳар) ҳодисадан кейин Исроилнинг хатти-ҳаракатларида сезиларли ўзгаришларни кўрмадим... Менинг идорам содир этилгани айтилаётган барча жиноятларни фаол равишда тергов қилмоқда. Қонунни бузганлар жавобгарликка тортилади», деб Хон сўзларини келтирди «Коммерсант».

Прокурор, шунингдек, Ғазо секторининг жанубий чегарасида жойлашган Рафаҳнинг бомбардимон қилингани ва Исроилнинг шаҳарга қуруқликдан бостириб киришига тайёргарлик кўрилаётгани ҳақидаги хабарлардан хавотирда эканини айтди. У, шунингдек, ҲАМАС томонидан гаровга олинганларни озод қилишга чақириб, бу масала ҳам ХЖС терговининг муҳим соҳаси эканини таъкидлади.

2023 йил 29 декабрда Жанубий Африка Халқаро судга Исроилга қарши даъво аризаси билан мурожаат қилди. Жанубий Африка расмийларига кўра, ҲАМАС ҳужумидан кейин Исроилнинг Ғазо секторидаги ҳаракатлари «геноцид характерига эга» ва «БМТ Геноцид конвенциясидаги асосий мажбуриятларни» бузади. 2024 йил 26 январда суд муваққат қарори билан яҳудий давлатига Ғазо секторида геноциднинг олдини олиш чораларини кўришни буюрди. “Замин” янгиликларини “Telegram”да кузатиб боринг