Германиялик қария чиқинди қутиларидан овқатланиб, катта бойлик тўплади ва 10 та уй сотиб олди

^{Фото: Objectiv.tv}
Германиянинг Дармштадт шаҳрида яшовчи Хайнц Б. егулик сотиб олиш ўрнига ахлат қутилари ичидан овқатланиб, катта бойлик тўплади. Бу ҳақда “Правила жизни” хабар бермоқда.

80 ёшли собиқ электромуҳандис ўз уйида ёлғиз яшайди ва ҳар бир нарсани тежайди. У ойига 3600 евро нафақа олади, бироқ озиқ-овқат учун 5 евродан кўп бўлмаган маблағ сарфлайди.

“Одамлар ҳар куни кўплаб нарсани исроф қилишади. Бутун бошли оилани боқиш учун етадиган овқатни чиқиндига ташлаб кетишади! Масалан, бир халта колбаса сотиб олиб, битта донасини истеъмол қилишади ва қолганини шунчаки ташлаб юборишади”, — деди у журналистларга.

^{Фото: Objectiv.tv}
Хайнц кийим-кечак ва бошқа кундалик ашёларни ҳам чиқиндилардан топади. Унинг ягона харажати — YouTube’да бизнесга оид маърузаларни томоша қилиш учун сотиб олган ноутбук ва ойлик интернет тўловидир. У мобил телефон ҳам ишлатмайди. Бундай ўта тежамкорлик туфайли нафақахўр 10 та уй сотиб олди ва уларни ҳозирда ижарага берган.

Хайнц ўлимидан кейин мол-мулклари кимга қолишини билмайди. Унинг оиласи йўқ, бир нечта узоқ қариндошлари бор, холос. “Улар мерос солиғини тўлай олмайди, уйларимни шунчаки ижарачиларга ҳадя қилиб юборсам керак”, — деб тан олди Хайнц.

^{Фото: Objectiv.tv} “Замин” янгиликларини “Telegram”да кузатиб боринг