Россияда Навальний хотираси учун йиғилган 200 дан ортиқ одам ҳибсга олинди

^{Фото: Reuters}
17 февраль куни Россия пойтахти Москва ва бир қанча бошқа шаҳарларда амалдаги мамлакат раҳбари Владимир Путиннинг мухолифи бўлган Алексей Навальний хотираси учун йиғилганларни ҳукумат ҳибсга олишни буюрган. Куч ишлатар тузилмалар ҳозирга қадар 212 нафар фуқарони ҳибсга олган. Бу ҳақда маҳаллий нашрларга асосланиб, Al Jazeera хабар берди.

Бу воқеа 2022 йилнинг сентябрь ойидан бери Россияда рўй берган энг йирик оммавий ҳибсга олиш кампанияси бўлди. Аввалги норозиликлар Украинадаги ҳарбий операцияни инсоний ресурс билан таъминлаш мақсадида “қисман сафарбарлик” жорий этилиши ортидан келиб чиққан эди. Намойишларда 1300 дан ортиқ киши ҳибсга олинганди.

Россияда намойишлар эркинлиги ҳақида хабар берувчи ОВД-Инфо маълумотларига кўра, Навальний ўлими ортидан юзага келган норозилик ҳолатлари Россиянинг 21 шаҳрида кузатилган. Йирик шаҳарлардан ҳисобланган Санкт-Петербургда камида 109 киши, Москвада эса 39 киши ҳибсга олинган.

Хабарда айтилишича, ҳибсга олинганлар сони бундан ҳам кўпроқ бўлиши мумкин. Ички ишлар органлари намойишлар билан боғлиқ маълумотни тақдим этмаганлиги боис, ҳибсдагиларнинг аниқ сонини айтиш имконсиз. “Замин” янгиликларини “Telegram”да кузатиб боринг