Россия Авдийивкада 16 минг аскар йўқотгани ҳақида ёзган ҳарбий мухбир жонига қасд қилди

^{Фото: «Нам пишут из Янины»}
Россиялик ҳарбий мухбир, «Нам пишут из Янины» телеграм-канали муаллифи, РФ армиясининг Мурз лақаби билан танилган ҳарбий хизматчиси Андрей Морозов ўз жонига қасд қилди. Унинг ўлими ҳақида 21 феврал тонгида «ПриZрак Новороссии», «Солдатская правда» ва «Zаписки Vетерана» каби Z-каналлар хабар тарқатди.

Ҳарбий мухбирлар билан гаплашган адвокат Максим Пашковнинг айтишича, Мурз ўзини отган. «Тунда биз у билан гаплашгандик. Бундай бўлишининг ҳеч қандай белгилари йўқ эди», — дея қўшимча қилган Пашков. Игор Стрелковнинг рафиқаси Мирослава Регинская ҳам Мурз ҳалок бўлганини тасдиқлаган. «Уни нима ўлдирганини кўпроқ одамлар билиши керак», — дея ёзган Регинская ўз телеграм-каналида ва «Нам пишут из Янины» каналидаги сўнгги постдан скриншот келтирган.

«ДХР» жамоат палатаси раҳбари Александр Кофман Мурзнинг ўлими юзасидан ҳамдардлик билдирган. «Тинч ухла, Мурз. Сен улкан хатога йўл қўйдинг, аммо унинг учун энди сендан бошқа ҳеч ким жавоб бермайди…» — дея ёзган у телеграм-каналида. «Медуза»нинг эътибор қаратишича, Россиядаги РИА Новости ва ТАСС давлат агентликлари, шунингдек «Российская газета» Кофманнинг постига асосланиб тарқатган хабарларида Мурз вафот этганини ёзишган, аммо у ўз жонига қасд қилганига тўхталмаган.

РФ мудофаа вазирлиги ҳам Мурзнинг вафоти юзасидан изоҳ бермаган.

Андрей Морозов ўз каналидаги сўнгги постларда ўлим олдидан ёзилган гапларини жойлаштирган ва «ўзини отмоқчилиги»ни билдирган. У ўлимидан «қайғуга тушмаслик»ни ва ўзини «ЛХР»даги қабристонга кўмишни сўраган.

Постларда айтилишича, 20 феврал куни қўмондонлик Мурзни каналдан қайсидир хабарни ўчиришга мажбурлаган. Гап катта эҳтимол билан Мурз Донецк областининг Авдийивка шаҳрини эгаллагани юзасидан билдирган шарҳи ҳақида кетмоқда. «Ҳарбий мухбир» аноним манбасига таянган ҳолда Россия армиясининг Авдийивкага юриш давомидаги тикланмас йўқотишлари сони 16 минг кишини ташкил этган, бундан ташқари, 300 га яқин зирҳли техникалар йўқ қилинган.

Россиялик пропагандачилар бу пост учун Мурзни қаттиқ танқид қилиб, унинг Авдийивкадаги йўқотишлар тўғрисидаги сўзлари «фейк ва РФ мудофаа вазирлигига туҳмат ҳисобланиши»ни айтишган, дея ёзади BBC рус хизмати. Морозовнинг телеграм-каналида айтилишича, унинг постини ўчириш тўғрисидаги буйруқ «Владимир Соловёв бошчилигидаги сиёсий фоҳишалар босими остида» берилган.

«Соловьев Live» эфирида Морозовни буллинг қилишда иштирок этган россиялик пропагандачи Юлия Витязева ҳам ўз телеграм-каналида унинг ўлими ҳақида пост ёзган, аммо унинг номини келтирмаган. Витязева «ўзини ўлдириш — гуноҳ, заифлик ва мағлубият» эканини таъкидлаб, содир бўлган воқеа «ўз дўсти ва қуролдошининг муаммолари ҳақида билатуриб, унга ҳеч қандай ёрдам кўрсатмаганларнинг виждонига ҳавола» эканини қўшимча қилган. У аввалроқ ўз постида Морозовни ўзини ўлдиришга чақирганди, ҳозирда бу пост ўчириб юборилган. Владимир Соловёв ўз манзилига билдирилган айбловларга муносабат билдирмаган.

Морозовнинг телеграм-каналида унинг васиятномаси ва 1487-сонли артиллерия полки ҳарбийсининг ҳарбий прокурорга мурожаати ҳам пайдо бўлган, унда қуроллар тақчиллиги, ротация ва тиббий ёрдам йўқлиги ҳақида сўз боради.

Янгиликлар