Украинани тиклаш 1 триллион долларга тушади, тахминий режа аллақачон мавжуд

^{Фото: Andrew Kravchenko/Bloomberg}
Фронтдаги вазият Украинадаги уруш қачон ва қандай якунланиши ҳақида тасаввур ҳосил қилиш имконини бермайди, аммо тобора кўпроқ компаниялар мамлакатдаги сармоявий иштирокини аста-секин ошириб, тиклаш жараёнини бошлашга тайёрланмоқда. Бу ҳақда Bloomberg ёзди.

Қайд қилинишича, Европа инвестиция банки Украинани тиклаш учун давлат ва хусусий капиталнинг 1 триллион доллардан кўпроқ маблағи сарфланиши мумкинлигини тахмин қилмоқда. Инфляцияни ҳисобга олган ҳолда, бу Германиянинг II Жаҳон урушидаги мағлубиятидан кейин Европани тиклашга қаратилган ва АҚШ томонидан молиялаштирилган Маршалл режасидан беш баравар кўпроқдир.

Нашр ёзганидек, келажакда тикланиш қандай содир бўлиши ҳақида тасаввурга эга бўлган тахминий режа аллақачон мавжуд.

Таъкидланишича, турк компаниялари кўприклар ва йўлларни қайта қурмоқда, электр генераторлари ва кўчма шифохоналар етказиб бермоқда. Хусусан, Туркиянинг Onur гуруҳи портлатилган кўприкларни таъмирлаш билан шуғулланяпти, масалан, Киев чеккасидаги Ирпенда. Шунингдек, Жанубий Кореянинг Samsung компанияси билан ҳамкорликда Onur Украинада мобил шифохоналар қурмоқда. Якунда компания Днепр халқаро аэропортини реконструкция қилмоқчи ва бир қатор автомобил йўлларини қайта тикламоқчи. Туркиянинг Dogus Construction компанияси Буюк Британия кўмагида учта кўприкни қайта қурмоқда ва келажакда «бир неча миллиард доллар» қийматидаги реконструкция шартномаларини кутмоқда.

Германия ва Австрия компаниялари инфратузилма ва мудофаа соҳаларида корхоналар қуришни режалаштирмоқда. Rheinmetall AG феврал ойида Украинада жуда зарур бўлган 155 миллиметрли артиллерия ўқ-дориларини ишлаб чиқарадиган завод яратиш режасини эълон қилди. Дарё ва водийларни боғловчи модулли пўлат эстакадалар ишлаб чиқарувчи Австриянинг Waagner-Biro Bridge Systems компанияси Украина ғарбидаги заводда аллақачон ишлаб чиқаришни йўлга қўйган.

JPMorgan Chase & Co «лойиҳа олди режалаштириши» учун ишчи гуруҳларни кутмоқда ва Дания ҳозиргача Николаев кемасозлик марказини тиклаш учун 120 миллион евро хайрия қилди.

Қурилиш материаллари ишлаб чиқарувчи Fixit компанияси ўтган йилдан бери Украина ғарбида янги ишлаб чиқариш майдончасини қурмоқда, Bayer AG кимё компанияси уруғчиликка сармоя киритилишини эълон қилди.

Пул қаердан келиши ҳисобга олинса, Америка ва Европа компаниялари шартномаларнинг асосий улушини олиши мумкин, деб ҳисобламоқда Bloomberg. «Замин»ни Telegram’да ўқинг!