Японияда биринчи хусусий ракета парвози портлаш билан якунланди

^{Фото: Kyodo}
Space One томонидан учирилган Kairos япон ракетаси парвозга чиққанидан сўнг дарҳол портлади. Бу Япония хусусий секторининг сунъий йўлдошни орбитага чиқаришга биринчи уриниши бўлди, деб хабар бермоқда Reuters.

18 метрли ракета Япония ғарбида Кии ярим оролидаги учириш майдонидан парвозга чиқарилди ва орбитага экспериментал разведка сунъий йўлдошини етказиши керак эди. Учириш дастлаб 9 мартга режалаштирилган эди, бироқ кейинга қолдирилди.

Эфир бошлангандан бир неча сония ўтгач кучли портлаш қандай содир бўлишини кўриш мумкин. Парчалар учиш жойига яқин тушди, уларнинг қулаган жойида кучли ёнғин чиқди ва қалин тутун устуни кўтарилди.

«Ракета миссиясини бажариши қийин бўлишини аниқлагандан сўнг парвозини тўхтатди», - деди Space One президенти Масакадзу Тойода.

Компаниянинг таъкидлашича, бутун учириш жараёни деярли тўлиқ автоматлаштирилган ва ўзини ўзи йўқ қилиш тўғрисидаги қарор, агар белгиланган йўналиш ҳамда тезликдан оғиш ёки бошқарув тизимидаги хатолар аниқланса, парвоз алгоритмлари орқали қабул қилинади. Space One ҳозирча нима содир бўлганини билмаяпти, лекин суриштирув ўтказишга ваъда берди.

Space One 2018 йилда япон компаниялари: Canon Electronics, Shimizu ва IHI Aerospace консорциуми томонидан яратилган. Ишлаб чиқувчилар 2020-йиллар охиригача ҳар йили 20 тагача ракета учиришни режалаштирмоқда, бу эса маҳаллий ва халқаро мижозларга «космик курерлик хизматларини» тақдим этади. Kairos ракета тизими Space One’нинг биринчи йирик лойиҳасидир.

Reuters агентлигининг қайд этишича, Япония космик пойгада кичик ўйинчи ҳисобланса-да, Хитой ва Россия каби технологик ва ҳарбий рақобатчиларга қарши туриш учун аэрокосмик саноатини жонлантиришга ҳаракат қилмоқда. Мамлакат, шунингдек, Япония ичида ҳам, ташқарисида ҳам сунъий йўлдош учирилишига ортиб бораётган талабни қондиришга интилмоқда. “Замин” янгиликларини “Telegram”да кузатиб боринг