Европа Иттифоқи Россиядаги сайлов ҳақида баёнот берди

^{Фото: Reuters}
Европа Иттифоқи Россиядаги президентлик сайловида ЕХҲТ кузатувчилари иштирок этмаганидан афсусда эканини билдирди ва «қаттиқ чекловлар шароитида ўтган» овоз бериш жараёнини танқид қилди. Тегишли баёнотни Европа Иттифоқининг ташқи ишлар бўйича олий вакили Жозеп Боррел эълон қилди.

Бироқ унинг баёноти Европа Иттифоқи Россиядаги сайлов натижаларини тан олмаслигини англатмайди.

«Сайлов тобора торайиб бораётган сиёсий маконда бўлиб ўтди, бу фуқаролик ва сиёсий ҳуқуқлар бузилишининг даҳшатли кучайишига олиб келди, кўплаб номзодларнинг сайловда иштирок этишига тўсқинлик қилинди, шу жумладан Россиянинг ноқонуний тажовузкор урушига қарши бўлганларнинг барчасини. Россиялик сайловчиларни танлаш имкониятидан маҳрум қилди ва уларнинг ишончли ахборот олиш ҳуқуқини кескин чеклаб қўйди», дейилади баёнотда.

Боррел, шунингдек, Россияда қатағонларнинг мунтазам кучайиб бораётганига, хусусан, мухолифат етакчиси Алексей Навалнийнинг қамоқдаги ўлимига ҳам эътибор қаратди.

Баёнотда, шунингдек, Европа Иттифоқи Украинанинг аннексия қилинган ҳудудларида овоз бериш жараёни ўтказилишини тан олмаслиги таъкидланади.

«Ушбу ҳудудлардаги «сайлов» Россия томонидан халқаро ҳуқуқнинг, жумладан, БМТ Низоми, шунингдек, Украина мустақиллиги, суверенитети ва ҳудудий яхлитлигининг яна бир очиқ-ойдин бузилишидир», деди Боррел.

Россия мухолифати вакиллари сайлов олдидан Европа Иттифоқини натижаларни тан олишдан расман бош тортишга чақирди. Хусусан, Юлия Навалная шундай баёнот берди. Европадаги баъзи сиёсатчилар ҳам сайлов натижалари тан олинмаслиги кераклигини айтди. “Замин” янгиликларини “Twitter”да кузатиб боринг