Песков президенти яҳудий бўлган Украина террорчиларга қандай алоқадор бўлиши мумкинлиги ҳақида нималар деди?

^{Фото: ZUMA Press Wire / Scanpix / LETA}
Матбуот учун брифинг чоғида РФ президенти матбуот котиби Дмитрий Песковдан Украина раҳбари яҳудий бўлса, «Крокус Сити Ҳолл»даги терактда қандай қилиб «Украина изи» бўлиши мумкинлиги ҳақида сўрашди. Кремл вакили эса Зеленский — «ўзига хос яҳудий» эканини айтди.

Журналистнинг брифингдаги саволи ва Песковнинг унга жавоби қуйидаги кўринишда бўлган:

Савол: Шундай саволга жавоб топиш мумкинми: Кремлдагилар у ерда нима бўлганда ҳам яҳудий раҳбарлик қилишини инобатга олган ҳолда терактни содир этганлар Украина раҳбарияти билан қандайдир алоқадор бўлиши мумкин деб ҳисоблайдими?

Песков: Хўш, у ерда Киев режими раҳбариятига сингиб кетган миллатчилик руҳига симпатия ва мойиллик кўрсатадиган ўзига хос яҳудий ўтирибди. Буни фактлар ва баёнотларга таянган ҳолда мутлақо аниқ қилиб айтиш мумкин.

Алоқадорликни қандай тарзда айтиш масаласига келсак, буни ҳар қандай тарзда айтиш мумкин. Ва эҳтимол, шарҳловчилар ва таҳлилчиларда шундай имкон бор. Аммо яна бир бор такрорлайман, тергов кетаётган маҳалда ҳеч бир расмий идора бу борада баёнот бера олмайди. Лекин сизга президент Путин сўнгги икки кунда берган баёнотларини диққат билан қайта ўқиб чиқишни маслаҳат бераман. Бу контекстда улар жуда муҳимдир.

Владимир Путин 23 март куни, «Крокус Сити Ҳолл»даги терактдан қарийб 20 соат вақт ўтганидан кейин россияликларга қилган мурожаатида тўрт нафар террорчи Украинага кетиш йўлида қўлга олингани, улар учун Украина томонда гўёки чегарадан ўтиш учун «туйнук» тайёрланган бўлганини маълум қилганди.

25 март куни Путин «террорчилар жиноятни қилгач, нега Украина томонга қараб қочгани, уларни у ерда ким кутиб тургани» ҳақидаги саволга жавоб топиш лозимлигини айтди. «Киев режимини қўллаб-қувватловчилар террорга шерик ва терроризм ҳомийси бўлиб қолишни истамаслиги маълум. Аммо саволлар чиндан ҳам жуда кўп», — деган РФ президенти.

У теракт «радикал исломчилар қўли билан» амалга оширилганини айтган, аммо Путиннинг фикрича, АҚШ бошқа мамлакатларни «Москва терактида гўёки Киев изи йўқлиги, қонли терактни ислом динига эътиқод қилувчилар содир этгани»га ишонтирмоқчи бўлмоқда.

«Крокус»даги теракт учун жавобгарликни ИШИДнинг «Хуросон вилояти» бўлими ўз зиммасига олган. Ғарбдаги бир қанча нашрлар америкалик расмийларга таяниб террорчиларнинг баёноти ҳақиқийлигини тасдиқлаган.

Украина терактга қандайдир алоқадорлигини рад этади. «Бугун Путин яна ўзи билан ўзи гаплашди ва буни яна телевидение орқали трансляция қилишди. Яна Украинани айблади. Хаста ва орсиз мавжудот. Унинг учун ўзидан бошқа ҳамма террорчилар, гарчи йигирма йилдан буён унинг ўзи террор билан шуғулланаётган бўлса ҳам. Айнан у — террор учун энг катта туйнук. У ва унинг махсус хизматлари», — деган Украина президенти Володимир Зеленский 25 март куни кечқурун йўллаган видеомурожаатида.

Владимир Путин Украина раҳбарияти ҳақида гапирганда мунтазам равишда антисемит баёнотлар беради. 2023 йил 5 сентябрда Путин «ғарблик кураторлар» бугунги Украинанинг «инсониятга қарши моҳиятини яшириш» учун Украинага «этник яҳудий»ни раҳбар қилиб қўйганини айтганди. 2023 йил июлда Путин «болаликдаги яҳудий дўстлари» Зеленскийни «яҳудий эмас, яҳудий халқи учун шармандалик» деб билишини айтганди. “Замин” янгиликларини “Telegram”да кузатиб боринг