08:08 / 29.03.2024

Оқ уй Украинанинг «Крокус» терактига алоқадорлиги ҳақидаги баёнотларни «тарғибот» деб атади

^{Фото: The Hill}
Оқ уй Россия расмийларининг «Крокус Сити Холл» концерт залидаги террорчилик ҳаракатига Украинанинг алоқадорлиги ҳақидаги баёнотларини «бемаънилик» ва «тарғибот» деб атади.

Оқ уйнинг миллий хавфсизлик масалалари бўйича маслаҳатчиси Жон Кирби брифингда ҳужум учун масъулият фақат ИШИД зиммасида эканини айтди.

«Мен Кремл ва Россия ҳукумати томонидан сўнгги бир неча кун ичида ИШИД террорчилик гуруҳининг концерт залига уюштирилган ва афсуски, 140 нафардан ортиқ одамнинг ҳаётига зомин бўлган терактига оид бемаъни гаплар ва ташвиқотларга жавоб бермоқчиман», деб Кирби сўзларини келтирди The Hill.

Унинг таъкидлашича, «ушбу ҳужум учун жавобгарлик фақат ИШИД зиммасида».

«Бу менга кичик фермаси бўлган амакимнинг бир гапини эслатди. <…> Унинг сўзларига кўра, энг яхши гўнг сотувчиси кўпинча оғзида намуна олиб юради. Россия амалдорлари гўнг сотувчиларига ўхшаяпти», деди Кирби.

Унинг сўзларини Россия ТИВ расмий вакили Мария Захарова изоҳлади.

«Рус тилида бундай мақоллар йўқ, чунки «гўнг»ни фақат океан ортидагилар оғзида олиб юради, бу ердагилар эмас. Аммо бизнинг бошқа нақлимиз бор: «Кимнинг қаери оғриса, ўша жойи ҳақида гапиради». Айтганча, нега штатларда «оғизни совун билан ювиш» ибораси кенг тарқалганлиги маълум бўлди», деб ёзди Захарова ижтимоий тармоқда.

Россия расмийлари 22 март куни Москва яқинидаги «Крокус Сити Холл» концерт залида содир бўлган терактга Украинанинг алоқадорлигини таъкидлашмоқда. Россия президенти Владимир Путин ҳужумнинг тўрт нафар айбдори Украинага кетаётганида қўлга олинганини, Украина томони гўёки улар чегарани кесиб ўтиши учун «туйнук» тайёрлаганини айтди. ФХХ директори Александр Бортников ва Хавфсизлик кенгаши котиби Николай Патрушев ҳам терактда Украинанинг иштирок этиши мумкинлиги ҳақида гапирди.

Украина расмийлари терактга алоқадорлигини рад этиб келмоқда.

Аввалроқ, ҳужум учун жавобгарликни «Вилояти Хуросон» номли ИШИД ячейкаси ўз зиммасига олган эди.