Перу президенти қароргоҳида полиция нега тинтув ўтказди?

^{Фото: Getty Images}
Перу полицияси ноқонуний бойишда гумонланаётган президент Дина Болуартенинг қароргоҳида тинтув ўтказди. Бу ҳақда Channelstv хабар берди.

Полициянинг таъкидлашича, рейд декларация қилинмаган Rolex соатларини “қидириш ва мусодара қилиш учун мўлжалланган”. Полиция ва прокуратуранинг қўшма операцияси Перу канали орқали намойиш этилган.

Давлат раҳбарига нисбатан иш бўйича тергов бошланишига газетадаги мақола сабаб бўлган. Унда мамлакат президенти қўлига қимматбаҳо соат тақиб юргани таъкидланган. Ҳашаматли буюмлар декларацияда келтирилмаган.

Тинтувлар чоғида президент қароргоҳда бўлмагани хабар қилинган. Перу бош вазири Густаво Адрианзен рейдни “ҳақоратомуз ва конституцияга зид” деб атаган. Болуартенинг ўзи ҳали уйидаги тинтувларга изоҳ бермаган.

У Перу конгресси собиқ президент Педро Кастилёга коррупцияда айблов эълон қилганидан кейин давлат раҳбари бўлганди. Ўша пайтда Дина Болуарте вице-президент эди.

ОАВ хабарларига кўра, Болуарте Перу президенти лавозимида ишлаган даврда мамлакат бўйлаб вақти-вақти билан унинг истеъфоси, парламентни тарқатиб юбориш ва зудлик билан сайловлар ўтказиш талаби билан норозилик намойишлари бўлиб ўтган.