16:24 / 01.04.2024

Исроилда Нетаньяху ҳукуматига қарши намойишлар бошланди (фото)

^{Фото: The Times of Israel}
Исроилда минглаб намойишчилар парламент яқинидаги кўчаларни тўлдириб, ҳукумат истеъфосини талаб қилиб, тўрт кунлик норозилик намойишларини бошлади. Бу ҳақда The Times of Israel хабар берди.

Намойиш ташкилотчилари бош вазир Биньямин Нетаньяху ва унинг ҳукуматини истеъфога чиқишга, Исроилда муддатидан олдин сайловлар ўтказишга ва мамлакат раҳбарларини Ғазода 7 октябрь куни ҲАМАС ҳужумидан кейин гаровга олинган 130 кишини озод қилиш бўйича келишувга рози бўлишга чақирди. Ташкилотчиларнинг айтишича, акцияда 100 мингдан ортиқ киши қатнашган.

^{Фото: The Times of Israel}
Митингда кўпчилик Нетаньяху ҳамон ҳокимиятда эканига ва ҲАМАС ҳужумидан олти ой ўтиб мамлакатда ҳали сайловлар ўтказмаганига норозилик билдирган. Намойиш пайтида Исроил байроғи ёқиб юборилган. Полиция маълумотларига кўра, камида бир намойишчи қўлга олинган.

^{Фото: The Times of Israel}

^{Фото: The Times of Israel}
"Биринчидан, биз сайловлар ўтказилишини истаймиз, чунки ҳозирги ҳукумат жамоатчиликни намоён қилмаяпти. Иккинчидан, гаровга олинганлар ҳали ҳам ўша ерда экан, танаффус қилиш учун яхши вақт эмас деб ўйлаймиз", — дейди намойишчилардан бири.

Ўтган ҳафта Кнессет палатаси қўмитаси мухолифат ва коалициядаги партияларнинг кескин эътирозларига қарамай, олти ҳафталик танаффусни маъқуллаш учун овоз берди. Танаффус 7 апрелдан 19 майгача давом этиши режалаштирилган.

"Ҳар уч кунда бир гаровга олинган киши вафот этади. Улар 42 кунлик танаффус қилишмоқда. Бу 14 нафар гаровга олинган ҳалок бўлади, деган маънони англатади", — дейди Радман исмли намойишчи.

^{Фото: The Times of Israel}
БМТ бош котиби Антониу Гутерриш Исроилни ғазоликларга ёрдам кўрсатиш йўлидаги барча тўсиқларни олиб ташлашга ва БМТнинг Фаластин қочқинлар бўйича агентлиги UNRWA конвойларига Ғазо шимолига етиб боришига рухсат беришга чақирган.