НАТО давлатлари Украинада алянс миссиясини яратишга келишиб олди

^{Фото: Getty Images}
НАТО аъзоларининг ташқи ишлар вазирлари Украинада алянс миссиясини яратишга келишиб олди. Бу ҳақда Полша ташқи ишлар вазири Радослав Сикорский маълум қилди.

«Бу биз жанг қиламиз, дегани эмас. Аммо энди биз Украинани қўллаб-қувватлашни мувофиқлаштириш, тайёрлаш ва режалаштиришда алянс имкониятларидан янада уйғунроқ фойдалана оламиз», деди вазир Брюсселдаги НАТО ташқи ишлар вазирлари саммити якунлари бўйича.

НАТО давлатларининг бошқа вакиллари ҳозирча бу баёнотга изоҳ бермади.

Бир кун олдин Сикорский НАТО миссиясини яратиш «Москва учун қарама-қаршилик» бўлмаслигини айтди, гарчи Россия президенти ўз фуқароларини НАТО билан зиддиятга ишонтиришга ҳаракат қилаётган бўлса-да.

«У мудофаа уруши ҳақидаги ёлғонни такрорламоқда. Мен унга НАТО давлатларига ҳужум қилишни маслаҳат бермайман, чунки биз 20 баробар боймиз, Россия бундай урушда ютқазади. Худди СССР совуқ урушда мағлуб бўлганидек», деди вазир.

Сикорскийнинг НАТО миссиясини яратиш ҳақидаги баёнотини Россия Давлат Думаси Мудофаа қўмитаси раҳбари Андрей Картаполов изоҳлади. У «бу кейинги қадамларни қонунийлаштириш, биз уларни диққат билан кузатиб борамиз» деди.

Аввалроқ, Россия президенти матбуот котиби Дмитрий Песков, агар алянс ҳарбийлари Украина ҳудудида пайдо бўлса, Россия ва НАТО ўртасида тўғридан-тўғри можаро муқаррар бўлишини таъкидлаган эди. У Франция президенти Эммануэл Макроннинг Украинага Европа давлатларидан қўшин юбориш ҳақидаги сўзларига шундай изоҳ берди. Песковнинг таъкидлашича, Россия билан тўғридан-тўғри тўқнашув НАТО манфаатларига мос келмайди.

Янгиликлар