АҚШда Трамп тарафдорлари Вакиллар палатаси спикерини лавозимидан четлата олмади

^{Майк Жонсон Фото: Tom Williams/CQ Roll Call/Sipa USA/picture alliance}
АҚШда Трампнинг ашаддий тарафдори бўлган конгрессмен Маржори Тейлор Грин ўзининг партиядоши Майк Жонсонни Вакиллар палатаси спикери лавозимидан четлата олмади. Резолюция лойиҳаси демократлар қўллаб-қувватлаши билан 8 май, чоршанба куни кечқурун рад этилди. Унга 359 киши қарши овоз берган бўлса, 43 киши қўллаб-қувватлади.

Конгрессдаги амалдаги қоидаларга кўра, ҳар қандай депутат Вакиллар палатаси спикерини лавозимидан четлаштириш тартиби ташаббуси билан чиқиши мумкин. Аммо Гриннинг ғояси олдиндан барбод бўлди, чунки АҚШ президенти Жо Байденнинг Демократик партияси конгрессменлари Жонсонни қўллаб-қувватлаш учун овоз берди.

АҚШ Республикачилар партиясида Украинага ёрдам бўйича можаро

Майк Жонсонни лавозимидан ағдаришга уриниш Республикачилар партияси ичида Россия билан урушда Украинага ҳарбий ёрдам кўрсатиш бўйича можаролар фонида юз берди. Партиянинг ўнг қаноти, жумладан, АҚШ собиқ президенти Доналд Трампнинг кўплаб тарафдорлари ёрдамни тўхтатишга интилмоқда.

Майк Жонсон бир неча ойлик иккиланишдан сўнг ён берди ва республикачиларнинг Украинага кўп миллиард долларлик янги ҳарбий ёрдам пакетини маъқуллашига яшил чироқ ёқди, бу эса ўз партияси сафидаги қаттиқ сиёсат тарафдорлари ва Трамп иттифоқчиларининг норозилигига сабаб бўлди.

Бир неча ой олдин Вакиллар палатаси спикери сифатида Жонсоннинг ўтмишдоши Кевин Маккарти ҳам худди шундай сабабларга кўра лавозимидан кетган эди. Доналд Трамп 5 ноябрга белгиланган АҚШ президентлиги сайловларида Республикачилар партиясидан номзод сифатида қайта кўрсатилиши мумкин. “Замин” янгиликларини “Twitter”да кузатиб боринг