Ўзбекистон элчихонаси Деҳли аэропортида 5 кг олтин билан ушланган фуқароларга боғлиқ ҳолатни назоратга олди

^{Фото: The Indian Express}
Ҳиндистон аэропортида икки нафар ўзбекистонлик 5 кило олтин билан ушлангани тўғрисида хабар берилганди. “Дунё” агентлигининг ёзишича, Деҳлидаги элчихона томонидан ўзбекистонликлар билан боғлиқ суриштирув жараёни назоратга олинган.

6 май куни Дубайдан Деҳлига учиб келган икки нафар ўзбекистонлик фуқаро тилла қуймаларини Ҳиндистон ҳудудига ноқонуний йўл билан олиб киришга уринаётганда қўлга олинган. Ҳозир уларга нисбатан суриштирув ишлари ўтказилмоқда.

Мамлакатнинг Деҳлидаги элчихонаси томонидан Ўзбекистон фуқаролари билан боғлиқ суриштирув жараёни назоратга олинган ва Ҳиндистоннинг масъул ҳуқуқ-тартибот идоралари билан ишчи алоқалар ўрнатилган. Шунингдек, вақтинча ҳибсга олинган ватандошлар билан учрашув ўтказиш чоралари кўрилмоқда.

Дипломатик миссия ўзбекистонликлардан хорижга, жумладан, Ҳиндистонга сафар қилиш чоғида чет давлатлар қонунчилиги талабларига қатъий риоя қилишга, турли шубҳали гуруҳлар ёки шахсларнинг ёлғон ваъдаларига алданиб қолмасликка, самолётга чиқиш олдидан бегона кишилардан юк ёки буюмлар олмасликка чақиради.

Ҳиндистонда турли кутилмаган нохуш ҳолларга тушиб қолган фуқаролар тезкор ва самарали консуллик-ҳуқуқий ёрдам олиш учун элчихона консуллик бўлимига +91 11 2467 0774/75 телефон рақами, ин[email protected], @consuluzbindia_bot Telegram боти орқали мурожаат қилиши мумкин.

2023 йил апрель ўрталарида Ҳиндистонда Индира Ганди аэропортидан 3,2 килограмм олтинни ноқонуний олиб ўтмоқчи бўлган ўзбекистонлик эркак ушланган эди. Ўзбекистон фуқароси Дубай рейсини амалга ошириш учун Чандигарҳ аэропортига қочиб кетган пайти қўлга тушган. Август ойида эса Ҳиндистон аэропортида саккиз нафар ўзбекистонлик 5 кило тилла занжирлар билан қўлга тушганди. “Замин” янгиликларини “Инстаграм”да кузатиб боринг