Франция Украинага ёрдам бериш учун қўшимча 650 млн евро ажратади

^{Фото: Google Images}
Франция Украинада умумий бюжети 450 миллион евро бўлган ривожланиш агентлигини очади ва муҳим инфратузилма лойиҳаларини қўллаб-қувватлаш учун 200 миллион евролик алоҳида фонд яратади. Бу ҳақда Le Monde Елисей саройига таяниб хабар берди.

Нашрнинг ёзишича, президент Владимир Зеленский ва Франция етакчиси Эммануэл Макрон 7 июнь, жума куни Украинага маҳаллий ҳукуматлар ва муҳим инфратузилмани, хусусан, энергетика соҳасини қўллаб-қувватлаш учун умумий қиймати 650 миллион евро миқдорида кредитлар ва хайриялар бўйича иккита келишув имзолайди.

Биринчи келишувда Франция тараққиёт агентлиги (АFD) “Украинадаги фаолиятини кенгайтириш учун 2027 йилгача 400 миллион евро миқдорида кредит ва 50 миллион евро миқдорида грантлар кўринишида лойиҳалаштирилган маблағлар ажратиши” назарда тутилган. Маблағлар, хусусан, энергетика ва транспорт соҳаларини қўллаб-қувватлашга йўналтирилади.

Нашрнинг ёзишича, 200 миллион евролик иккинчи келишув энергетика, транспорт, сув таъминоти ва канализация, соғлиқни сақлаш соҳаларида Франция улуши бўлган компаниялар иштирокидаги лойиҳаларни қўллаб-қувватловчи икки томонлама жамғарма яратишга тегишли. «Замин»ни Telegram’да ўқинг!