Макрон ва Зеленский учрашуви: Париж 4500 нафар украиналик аскарни ўқитади

^{Фото: AP}
Франция Украина қуролли кучларининг 4500 аскарига тенг бўлган бутун бир бригадасини ўқитиш ва жиҳозлаш ниятида. Бу ҳақда Франция президенти Эммануэл Макрон 7 июн, жума куни Украина етакчиси Володимир Зеленский билан учрашувдан сўнг ўтказилган матбуот анжуманида маълум қилди.

Унинг таъкидлашича, у ўз ҳудудида украиналик аскарлар тайёрланишини кескинлашув учун сабаб деб ҳисобламайди. «Бу Украинанинг қонуний илтимоси ва у бизнинг йўналишимизга тўғри келади: биз Россия билан уришмаяпмиз, лекин Украинани тўлиқ қўллаб-қувватлаймиз», деди Франция президенти.

Бундан ташқари, Эммануэл Макрон Кремлни Киев ҳамкорларини Украинага ёрдам беришни тўхтатишга мажбурлаш учун Ғарбни қўрқитишда айблади. Макрон, шунингдек, ой охиригача Украинанинг Европа Иттифоқига қўшилиши бўйича музокараларни бошламоқчи эканини қўшимча қилди ва саммитни Швейцарияда ўтказиш муҳимлигини таъкидлаб, уни «мустаҳкам тинчлик ўрнатиш йўлидаги қадам» деб атади.

Франция президенти Киевга ҳарбий ёрдам беришдан ташқари, Париж томонидан бюджети 200 миллион евро бўлган махсус жамғарма ташкил этилишини эълон қилди, унинг вазифаси Украина инфратузилмасини реконструкция қилиш бўлади.

Эммануэл Макрон ва Володимир Зеленскийнинг Елисей саройидаги учрашуви Украина етакчисининг Нормандияда Ҳитлерга қарши коалициядаги иттифоқчилар қўниши 80 йиллигига бағишланган тадбирлардаги иштироки доирасида бўлиб ўтди. «Замин»ни Telegram’да ўқинг!