Украина Трампнинг маслаҳатчилари режаси ҳақида: тинчлик адолатли бўлиши керак

^{Михаил Подоляк Фото: Виталий Носач/РБК-Украина}
Россиянинг Украинага қарши урушини тугатишга қаратилган ҳар қандай тинчлик режаси халқаро ҳуқуққа асосланиши ва адолатли бўлиши керак. Бу ҳақда 25 июн, сешанба куни Украина президенти девони раҳбари маслаҳатчиси Михаил Подоляк АҚШ собиқ президенти Доналд Трампнинг икки маслаҳатчиси - истеъфодаги генерал-лейтенант Кит Келлог ва Фред Флейтц тақдим этган Украинадаги ҳарбий можарони ҳал қилиш бўйича режани изоҳлар экан, айтиб ўтди.

«Украинада мутлақо аниқ тушунча бор ва у президент Володимир Зеленский томонидан таклиф қилинган тинчлик формуласида аниқ ёзиб қўйилган: тинчлик фақат адолатли ва халқаро ҳуқуққа асосланиши мумкин», деди Подоляк Reuters агентлигига.

Подоляк таъкидлаганидек, ҳозирги фронт чизиғида урушни музлатиш «ғалати» бўларди, чунки Россия Федерацияси халқаро ҳуқуқни бузган ва Украина ҳудудида бўлиб турибди. Унинг қўшимча қилишича, уруш Россия жавобгарликка тортилмасдан туриб тугамайди. Подоляк, шунингдек, Россия раҳбарияти томонидан илгари сурилган ўт очишни тўхтатиш шартларини маъносиз деб атади.

Россия билан қурол эвазига тинчлик музокаралари

Бир кун аввал Reuters агентлиги Доналд Трампнинг маслаҳатчилари унга президентлик сайловларида ғалаба қозонган тақдирда Россия ва Украина ўртасидаги урушни тугатиш режасини тақдим этгани ҳақида хабар берган эди.

Ҳужжатда Украинага кўпроқ Америка қуроллари берилиши кўзда тутилган, бироқ у Россия Федерацияси билан тинчлик музокараларига киришиши талаб этилади. Шу билан бирга, Қўшма Штатлар Москвани музокаралардан бош тортиш АҚШ томонидан Украинага ҳарбий ёрдам кучайишига олиб келиши ҳақида огоҳлантиради.

Ҳужжат, шунингдек, фронт чизиғида ўт очишни тўхтатиш ва шу тариқа эгаллаб олинган Украина ҳудудлари устидан Россия назоратини сақлаб қолишни назарда тутади. Фред Флейтцга кўра, Украина яқин келажакда ўзининг барча ҳудуди устидан самарали назоратни тиклай олиши даргумон.

Режа муаллифларининг фикрича, Россия музокаралар жараёнида иштирок этиши учун яна бир рағбат АҚШнинг Украина НАТОга аъзо бўлиб киришини узоқ муддатга кечиктириш ваъдаси бўлиши мумкин.

Украина ҳудудий имтиёзларни рад этяпти

Ўз навбатида, Украина ҳукумати ҳудудий имтиёзларни истисно қилди ва Россия Федерацияси билан тинчлик музокараларини бошлашнинг дастлабки шарти сифатида Украина чегараларини 1991 йилги ҳолатга тиклаш талабини илгари сурди.

Доналд Трамп бўлажак президентлик сайловларида ғалаба қозонса, «24 соат ичида» Россия ва Украина ўртасида тинчлик келишувига эриша олишини бир неча бор таъкидлаган. Трамп буни аниқ қандай қилишни режалаштираётганини айтмаяпти. “Замин” янгиликларини “Facebook”да кузатиб боринг