09:55 / 28.06.2024

Ўзбекистонлик эркак 11,8 млн долларлик криптовалюта ўғирлашда айбланиб, АҚШга экстрадиция қилинди

^{Иллюстратив фото: Getty Images}
Ўзбекистонлик 37 ёшли Никита Андреевич 11,8 миллион долларлик криптовалютани ўғирлашда айбланиб, Украинадан АҚШга экстрадиция қилинди.

АҚШ адвокати Трини Россга кўра, айбланувчи Валерий Дорожкин номи билан ҳам танилган. У криптовалюта ўғирлаш мақсадида электрон алоқа воситаларидан фирибгарлик фаолиятини амалга оширганликда айбланмоқда. Бу айбловлар энг кўпи 20 йил қамоқ жазоси ва 250 минг доллар жаримани ўз ичига олади.

Тегишли иш билан шуғулланаётган АҚШ адвокати ёрдамчиси Дуглас Пенросенинг таъкидлашича, 2018 йил июнь ойида ўзбекистонлик эркак Apple компаниясига EОSIО Wallet Explorer номли иловасини тақдим этиб, уни Apple App Store дўкони орқали сотишни ният қилган.

EОSIО Wallet Explorer гўёки криптовалюта ҳамёни сифатида кўрсатилган, аслида эса фойдаланувчиларнинг шахсий маълумотларини ўғирлаш учун мўлжалланган зарарли дастур бўлиб, шу тариқа Дорожкин криптовалюта фондларига кириш ҳуқуқини олган.

2018 йил сентябрь ойида Нью Ёркнинг Ғарбий округидан бир киши (жабрланувчи) ўзининг iPhoneъига EОSIО Wallet Explorer’ни сотиб олиб ўрнатган. Жабрланувчи ўзининг шахсий калитини (маълумотни) киритганидан сўнг, Ўзбекистон фуқароси жабрланувчининг криптовалюта ҳамёнига рухсатсиз кириш ҳуқуқига эга бўлган. Ҳамёнда ўша пайтда қиймати 11,8 миллион долларга тенг бўлган 2 миллиондан ортиқ EОS криптовалюталари бўлган.

2018 йил 25 сентябрда Дорожкин жабрланувчининг ҳамёнидаги шахсий калитни ўзгартирган, натижада жабрланувчи ўз маблағларини бошқариш ва фойдаланиш имкониятини йўқотган.

2019 йил февраль ойида Ўзбекистон фуқароси EОS криптовалютасини жабрланувчининг ҳамёнидан ўз назорати остидаги кўплаб бошқа онлайн ҳамёнларга ўтказган. Адлия департаментининг Халқаро алоқалар бошқармаси ўзбекистонликни ҳибсга олиш ва экстрадиция қилишни таъминлаш учун Руминия ва Украина расмийлари билан ҳамкорлик қилган. Валерий Дорожкиннинг жиноятда айбдорлиги исботланмагунча айбсиз ҳисобланади. У 2024 йил 3 июлга белгиланган суд тингловига қадар ҳибсда қолмоқда.