Қирғизистон президентининг жиян куёви ҳибсга олинди

^{Фото: Видеодан кадр}
Қирғизистон ҳуқуқ-тартибот идоралари президент Садир Жапаровнинг жияни - Лаззат Нуркожоеванинг қайлиғи бўлган Афтондил Сабирбековни ушлади. У наркотик моддаларни сотишда гумонланмоқда, дея хабар бермоқда 24.kg нашри.

У тергов изоляторига жойлаштирилган.

Президент матбуот котиби Аскат Алагозов ҳам Сабирбеков ушланганини тасдиқлаган. У Сабирбековнинг ноқонуний ишларини ҳимоя қилиш учун ҳокимиятдагилар орасидан тиргак излаганига тўлиқ асос борлигини таъкидлаган.

Аскат Алагозов, шунингдек, Сабирбековни «собиқ куёв» дея таърифлаб, у ва шерикларининг хатти-ҳаракатларига тергов жараёнида ойдинлик киритилишини қайд этган.

Эслатиб ўтамиз, июн ойи охирида Сабирбеков ва Нуркожоеванинг унаштирув маросими катта шов-шув кўтарганди. Лаззат Нуркожоева унаштирув маросимига Фавқулодда вазиятлар вазирлигига тегишли вертолётда учиб боргани жамоатчилик эътирозини келтириб чиқарди. Бунинг ортидан президент Садир Жапаров омма олдида узр сўрашга мажбур бўлди.

«Мамлакат раҳбариятига яқинлар бошқаларга ўрнак бўлиши керак. Мен исрофгарчиликка чек қўйиш лозимлиги ҳақида кўп такрорлайман. Ҳеч бўлмаганда, бўлажак куёв мени қўллаб-қувватлаб, қўлни бундай сўрашдан олдин ўйлаши керак эди. У танқидга учрамасликка, президентни ноқулай ҳолатда қолдирмасликка ҳаракат қилиши керак эди. Ўйлайманки, у ёшлик қилган. Агар у келиб, унинг қўлини оддийгина сўраганида ҳам уни рад қилишмасди», деди Жапаров.

Жапаров изоҳида вертолётларни ижарага беришдан келадиган пуллар бюджетга тушишини, бу пуллар эвазига ФВВ вертолёт паркини янгилашини эслатиб ўтган. Шу билан бирга, у ўз оиласи аъзолари пул сарфлашда ўзини тийиши лозимлигини қайд этганди.

Янгиликлар