Байден бир куннинг ўзида Зеленскийни Путин, Ҳаррисни — Трамп деб атади

^{Фото: AFP}
АҚШ президенти Жо Байден Вашингтондаги НАТО саммити вақтида Украина президенти Володимир Зеленскийни Владимир Путин деб таништирди, бир неча соатдан кейинги матбуот анжумани вақтида эса АҚШ вице-президенти Камала Ҳаррисни Доналд Трамп деб атади.

«Энди мен сўзни шундай жасорат ва қатъиятга эга Украина президентига бермоқчиман. Хонимлар ва жаноблар, президент Путин», — деган 81 ёшли Байден саммитда Зеленскийни таништираркан.

Чиқиш видеосида кўриш мумкинки, АҚШ президенти хато қилганини дарҳол тушунган. «Президент Путин? У президент Путинни енгади, президент Зеленский. Мен бор эътиборимни у президент Путинни мағлуб этишига қаратанман», — деган Байден.

Зеленский микрофон олдига келаркан, шундай дейди: «Мен яхшироқман». Бунга жавобан Байден айтади: «Сен анча яхшироқсан».

Бир неча соат ўтиб матбуот анжуманида қатнашган Байден биринчи саволга жавоб бериш асносида вице-президент Камала Ҳаррисни президентликка Республикачилар партиясидан номзод бўлган Доналд Трамп билан адаштириб юборган.

«Мени эшитинг, агар мен уни президентликка лойиқ деб ўйламаганимда, вице-президент Трампни вице-президентликка танлаган бўлардимми?» — деган Байден журналистнинг саволига жавобан.

Reuters агентлиги қайд этишича, матбуот анжумани бошланишида Байден тез-тез йўталган ва баъзида ўз жавобларида чалкашиб кетган, унинг охирига келиб эса кескин жавоб бера бошлаган.

АҚШ президенти Жо Байден 27 июн куни Доналд Трампга қарши илк сайловолди дебатини ўтказганди. Шундан кейин Демократик партия вакиллари уни сайловолди пойгасидан чиқишга чақира бошлаган. Байден бунга жавобан ноябр ойига белгиланган президентлик сайловларида ғалаба қозонмоқчи эканини айтди. Politico маълумотига кўра, НАТО саммити арафасида дипломатлар ва жаҳон давлатлари етакчилари Жо Байденнинг ёши ва саломатлиги борасида «қаттиқ ташвишланган».

Америка ОАВга кўра, 2023 йил ёзидан буён Оқ уйга Паркинсон касаллиги бўйича мутахассис, невролог Кевин Канард саккиз бор ташриф буюрган. Оқ уй матбуот котиби Карин Жан-Пиер бу хабар юзасидан изоҳ бераркан, Байден Паркинсон касаллигидан даволанмаётгани ва унга қарши дори қабул қилмаётганини билдирган.

Янгиликлар