ФҚБ Трампни отганнинг шахсини очиқлади

^{Фото: Gene J. Puskar / AP / Scanpix / LETA}
АҚШ собиқ президенти Доналд Трампга суиқасд уюштиришда гумонланганнинг шахси маълум бўлди — бу Пенсилвания штати, Бетел-Парк шаҳарчасидан бўлган 20 ёшли Томас Мэттю Круксдир, деб хабар бермоқда The Washington Post Федерал қидирув бюрога асосланиб.

Бетел-Парк суиқасд рўй берган Батлердан 70 км масофада жойлашган.

Крукс 13 июл куни Пенсилваниянинг Батлер шаҳрида Трамп тарафдорлари иштирокидаги митинг чоғида ўт очган. Крукс митинг жойидан тахминан 100-120 метр масофадаги қўшни бино томидан туриб, AR-15 русумли яримавтомат милтиқдан ўт очган.

Отишма чоғида митингга келганлардан бири ҳалок бўлиб, яна икки нафари яраланган ва оғир аҳволда қолмоқда. Ўқлардан бири Доналд Трампнинг ҳам ўнг қулоғи юқори қисмини ялаб ўтган. Бош қисми қонга беланган ҳолда кўриниш берган собиқ президент дарҳол шифохонага олиб кетилган. Трампнинг сайловолди кампанияси вакиллари ҳозирга келиб у билан «барчаси жойида» эканини маълум қилган.

АҚШ собиқ президентига суиқасд уюштиришда гумонланувчи Махфий хизмат ходимлари томонидан отиб ўлдирилган. ФҚБ маълумотига кўра, у муқаддам жиноий жавобгарликка тортилмаганди. Унинг мотивлари ўрганилмоқда.

Бу вақтда ижтимоий тармоқларда Крукс «республикачилар ва Трампдан нафратланиши»ни айтган видео тарқалмоқда. У республикачилар «нотўғри одамни танлагани»ни қўшимча қилади. “Замин” янгиликларини “Одноклассники”да кузатиб боринг