Дунё етакчилари Дональд Трампга қилинган суиқасдни қоралади

^{Фото: Getty Images}
Австралиядан Буюк Британиягача, Хитойдан Украинагача бутун дунё етакчилари АҚШнинг собиқ президенти ва сайловга номзод Дональд Трампга суиқасд уюштирилишини қоралади.

Исроил бош вазири Биньямин Нетаньяху биринчилардан бўлиб, ўзи ва унинг рафиқаси президент Трампга қилинган ҳужумдан ҳайратда қолганини ва унинг хавфсизлиги ҳамда тезроқ тузалиб кетиши учун ибодат қилишаётганини айтган.

Венгрия бош вазири Виктор Орбан Х ижтимоий тармоғида унинг фикрлари ва ибодатлари ушбу қоронғи соатда президент Трамп билан эканини ёзган.

"Менинг фикрларим суиқасд қурбони бўлган президент Дональд Трамп билан. Бир нафар томошабин ҳалок бўлди ва бир неча киши яраланди. Франция Америка халқининг шок ва ғазабини баҳам кўради", — дейди Франция президенти Эммануэл Макрон.

Яқинда суиқасддан омон қолган Словакия бош вазири Роберт Фицо воқеада Трампнинг сиёсий рақибларини айблаган.

Украина президенти Владимир Зеленский ўз видеомурожаатида Трампга суиқасдни “фақат қоралаш мумкин бўлган даҳшатли жиноят” деб атаган:

"Зўравонлик ҳеч қандай шаклда ва ҳеч қаерда устун бўлмаслиги керак, мен Америка бу қийинчиликни муносиб тарзда енгиб ўтишига ишонаман, жаноб Трампга шифо тилайман".

Хитой раҳбари Си Цзиньпин собиқ президент Трампга ҳамдардлик билдирган.

Трампга суиқасдни Европа дипломатияси раҳбари Жосеп Боррел, БМТ бош котиби Антониу Гутерриш, Буюк Британия бош вазири Кей Стармер, Германия канцлери Олаф Шольц, Ҳиндистон бош вазири Нарендра Моди, Қозоғистон президенти Қосим-Жўмарт Тўқаев, Озарбайжон президенти Илҳом Алиев, Молдова президенти Майя Санду ҳамда Ўзбекистон президенти Шавкат Мирзиёев ҳам қоралаган.

Президент матбуот котибининг хабар қилишича, Шавкат Мирзиёев АҚШ собиқ президенти Дональд Трамп Пенсильвания штатида сайловолди учрашувда нутқ сўзлаётган чоғида унинг ҳаётига суиқасд уюштирилгани ҳақидаги хабарни чуқур хавотир билан қабул қилган.

Ўзбекистон президенти ушбу зўравонлик ҳаракатини кескин қоралади ва Дональд Трампга тез фурсатда соғайиб кетишини тилади.

Дональд Трампга суиқасд

АҚШнинг собиқ президенти Дональд Трамп 14 июль куни Пенсилваниянинг Батлер шаҳридаги сайловолди митинги пайтида яраланган эди. Ҳодиса акс этган видеода унинг чиқиши чоғида ўқ овозига ўхшаш товушлар эшитилган. Шундан сўнг Трамп қулоғини ушлаб ётиб олган. Қўриқчилар шу заҳоти Трампни ўраб олди. Президентликка номзод ўрнидан турганида қулоғидан қон оқаётганини кўриш мумкин. Махсус хизмат агентлари уни қуршаб олиб, кўтарилишга ёрдам берди ва саҳнадан олиб кетган.

Бу ҳодиса қотилликка уриниш сифатида баҳоланмоқда. Ўқ узган шахс махсус хизмат ходимлари томонидан ўлдирилган.

Айни пайтда унинг аҳволи яхши эканлиги айтилмоқда. АҚШнинг амалдаги президенти Жо Байден Трампнинг хавфсизликда эканини ҳамда ўзини яхши ҳис қилаётганини эшитганидан хурсанд эканини айтган. Ҳар икки йирик партиянинг америкалик сиёсатчилари Трампни қўллаб-қувватловчи ва сиёсий зўравонликни қораловчи баёнотлар билан чиқмоқда. “Замин” янгиликларини “Telegram”да кузатиб боринг