Зеленский истеъфога чиқиш ҳақида гапирди

^{Фото: Reuters}
Украина президенти Владимир Зеленский лавозимини тарк этиши мумкинлигини, аммо бу фақат уруш тугаганидан кейин амалга ошишини айтди. Бу ҳақда у BBC’га берган интервьюсида маълум қилди.

Журналист сиёсатчидан унинг президент лавозимидан кетиши эҳтимолини сўради. Бунга жавобан Зеленский “биз ҳаммамиз ҳам инсонмиз”, дея тасдиқлаб жавоб берди. Украина президенти ҳокимиятни бошқа бировга топшириши мумкинлигини тан олди, лекин бу Россия билан уруш тугаганидан кейингина содир бўлишини айтди.

“Биз бу урушни тугатишимиз керак. Биз Путинга барҳам беришимиз керак. Ўйлайманки, бу халқимиз ва мамлакатимиз учун жуда муҳим”, деди сиёсатчи.

Июнь ойида Зеленский ўз президентлиги даврида Украинадаги урушни тугатишга қатъий қарор қилганини айтганди.

Украина Конституциясига кўра, мамлакатда навбатдаги президентлик сайловлари 2024 йил 31 мартда бўлиб ўтиши керак эди. 2024 йил 20 майда Владимир Зеленский инаугурациясидан кейинги Конституцияда белгиланган беш йиллик муддати тугади. Январь ойида сиёсатчи сайловларни қолдирмаётганини, лекин уларни шунчаки ўтказа олмаслигини айтди, чунки бу уруш пайтида қонун билан тақиқланган.

20 февраль куни Киев халқаро социология институти тадқиқот натижаларини эълон қилди, унда келтирилишича 2024 йил февраль ҳолатига кўра, украиналикларнинг аксарияти, яъни 69 фоизи Владимир Зеленский ҳарбий ҳолат тугагунча президент сифатида қолиши керак, деб ҳисоблайди.

Зеленскийнинг таъкидлашича, Украинадаги сайловлар ҳарбий ҳолат пайтида, қонунчиликдаги ўзгаришлар ва овоз беришни хавфсиз тарзда ташкил этиш шарти билан ўтказилиши мумкин ва жараёнда барча украиналиклар ҳам мамлакат ичида, ҳам фронтда, ҳам хорижда иштирок этиши керак.

Украина адлия вазири Денис Малюська Зеленский 2024 йил 21 майдан кейин ўз қонунийлигини йўқотмаганини, унинг ваколатлари кейинги президент сайлангунга қадар давом этишини айтган. File engine/social.php not found.