2024 йилги Париж Олимпиадасида чипталар савдоси бўйича рекорд ўрнатилди

^{Фото: Getty Images}
Франция пойтахти Парижда 26 июлдан 11 августгача бўлиб ўтадиган Олимпиада ўйинлари учун чиқарилган 10 миллион чиптадан 9,3 миллиони сотилган. Бу ҳақда Anadolu хабар берди.

Қайд қилинишича, чипталар нархи 90, 250, 500, 900, 1600 ва 2700 евро бўлиб, 2700 евролик чипта эгалари овқатни ўз ичига олган пакет учун жами 3850 евро тўлайди.

Агар 1996 йилда Атлантада (АҚШ) 8,3 миллион чипта сотилган бўлса, 28 йилдан кейин Парижда бу рекорд янгиланди.

Париж Олимпиадасининг 90, 250 ва 500 еврога баҳоланган барча чипталари сотилиб кетган. 900, 1600 ва 2700 еврога баҳоланган чипталар ҳам деярли сотилиб бўлган.

Олимпиада ўйинлари тарихида илк бор очилиш маросими шаҳар бўйлаб ўтказилади ва ҳамма учун очиқ бўлади. Маросим иштирокчилари карвонлари Сена дарёси бўйлаб 6,5 километрлик чизиқ бўйлаб ҳаракатланади. Маросим Трокадеро майдонида тугайди.

Таъкидланишича, Париж шаҳрининг Сена дарёси атрофидаги уй эгалари талаб юқорилиги туфайли, уй ижараси нархини кескин кўтарган. Масалан, 26 июл кунги очилиш маросимида уй ижараси нархи 20 минг евродан ошган.

Ўзбекистон Олимпиада тарихида илк бор 19 спорт турида 90 нафар атлет билан иштирок этади.