Ғарб давлатлари ўз фуқароларини Ливанни тарк этишга чақирмоқда

^{Фото: AP/ Байрут портида селитра портлаши оқибатлари}
Германия Ливаннинг Голан тепаликларига уюштирган ракета ҳужумларига Исроилнинг кенг кўламли жавоб қайтаришидан қўрқиб, ўз фуқароларидан зудлик билан Ливанни тарк этишни сўради.

"Вазиятнинг янада кескинлашиши ва можаронинг кенгайишини инкор этиб бўлмайди", дейилади Германия Ташқи ишлар вазирлиги баёнотида.

Вазирликнинг қўшимча қилишича, бу, хусусан, Ливан жанубига, жумладан, Байрутнинг жанубий шаҳарларига тегишли. Кейинчалик эскалация Рафиқ Ҳаририй аэропортидан ҳаво қатновининг тўлиқ тўхтатилишига олиб келиши мумкин.

Ливандан ҳаво орқали чиқиб кетишнинг иложи бўлмайди, дея таъкидлаган Германия ТИВ.
Аввалроқ Буюк Британия, Франция ва АҚШ ҳам худди шундай огоҳлантиришлар билан чиққан эди.

Исроил Ливан жанубига ҳужумларини давом эттирмоқда. 29 июль куни содир этилган ҳужумлар натижасида Шакра шаҳрида икки киши ҳалок бўлган, яна уч киши яраланган эди.

Оқ уйга кўра, Исроил “Ҳизбуллоҳ”нинг Голан тепаликларига берган зарбасига жавоб беришга тўлиқ ҳақли, бироқ Исроил-Ливан чегарасида кескинлик кучайиб бораётган бир пайтда давлатларни вазминликка чақирган.

"Бизнинг фикримизча, бу кескинликка олиб келиши учун ҳеч қандай сабаб йўқ. Дипломатия учун ҳали вақт ва жой бор", деган Оқ уйнинг миллий хавфсизлик вакили Жон Кирби.

“Ҳизбуллоҳ” аниқ бошқариладиган ракеталарни ҳаракатга келтира бошлаганини, бироқ Исроил билан кенг миқёсли урушни истамаслигини айтган. Исроил Бош вазири Биньямин Нетаньяху ракета ҳужуми содир бўлган жойга ташриф буюрган ва “жавоб қайтарилиши ва бу қаҳрли бўлиши”ни айтган. «Замин» янгиликларини «Вконтакти»да кузатиб боринг