Митҳун Чакраборти асраб олган қизалоқ ҳозирда қандай яшайди?

Митҳун Чакраборти — 80 йилларнинг иккинчи ярмида “Диско раққоси” фильмидаги унутилмас роли туфайли машҳур бўлган афсонавий ҳинд актёри. Ушбу фильмдаги ижроси унга нафақат жаҳон шон-шуҳратини, балки бутун дунёдаги мухлислар меҳрини ҳам келтиради.

У нафақат мода ва услуб тимсолига, балки ёшлик ва эркинлик рамзига айланади. Унинг истеъдоди бутун дунёда эътироф этилиб, номи муваффақият ва истеъдоднинг синонимига айланади.

Митҳун Чакраборти “Диско раққоси”дан кейин фаолиятини давом эттириб, бошқа кўплаб муваффақиятли фильмларда рол ўйнайди. У нафақат истеъдодли актёр, балки ўз ишининг устаси эканлигини ҳам исботлайди. Актёр сифатидаги ажойиб маҳорати уни ҳинд кино саноатида афсонавий шахсга айлантиради.

Модель Хелен Люк билан қисқа муддатли биринчи турмушидан сўнг, Митҳун Чакраборти актриса Югита Балига уйланади.

Уларнинг никоҳи Югитанинг садоқати туфайли 40 йилдан ортиқ давом этади. У эрининг ёшликдаги ишларини кечиради ва уч ўғилни дунёга келтиради.

Митҳуннинг ўғилларидан ташқари кенжа қизи ҳам бор. 90 йилларнинг охирларида Митҳун Чакраборти ахлатхонага ташлаб кетилган мана шу қизалоқни асраб олади. Бу фожиали воқеа унинг ҳаётини тубдан ўзгартиради.

Юраги раҳм-шафқат ва меҳрга тўла Митҳун ҳимоясиз қизга бахтли ҳаёт учун янги имконият беради.

Ўшнада Митҳун Чакраборти телевизор кўраётганда даҳшатли воқеа унинг эътиборини тортади. Хабарда айтилишича, ўткинчи бир киши ахлат қутисидан ота-онаси ташлаб кетган кичкина қизчани топиб олган. Бола ҳаёт ва ўлим ёқасида бўлиб, касалхонага ётқизилади.

Эртаси куни эрталаб Митҳун Чакрабортининг ҳашаматли машинаси клиника эшиги олдида турарди. Митҳун ва унинг рафиқаси касалхонага етиб келишади ва болани асраб олишга тайёр эканликларини эълон қилишади.

Қизалоққа Дишани деб исм беришади, у Чакраборти оиласининг тўлиқ аъзосига айланади. Дишани оилада меҳр-муҳаббатни ҳис қилиб улғаяди. У уч акасидан ҳам кўпроқ эркаланган.

Дишанининг оиласида ҳис қилган муҳаббат кучи унинг келажагини ишонч билан қуришига ёрдам беради. У нафақат Митҳун Чакраборти ва унинг рафиқаси Югита Балининг қизи, балки меҳрибонлик туфайли кимнингдир ҳаётини бутунлай ўзгартириб юбориш мумкинлигига намуна ҳам бўлади.

Митҳуннинг ўзи қизи ҳақидаги бу воқеани 2017 йилга келибгина айтиб беради. Ҳозир Дишани 25 ёшда. У ота-онасининг изидан бориб, актриса бўлишга қарор қилган.

Қиз сўнгги бир неча йил ичида Лос-Анжелесдаги Ли Страсберг томонидан асос солинган машҳур театр институтини тамомлади. Ҳозирда у профессионал актёрлик маълумотига эга.

Ўқиш даврида Дишани қисқа метражли фильмларда бир нечта ролларни ижро этган. Улардан бири “Муқаддас тутун” фильмини унинг акаси — режиссёр Ушми Чакраборти суратга олган. Кўплаб машҳур болалардан фарқли ўлароқ, Дишани ҳашаматли ҳаётга интилмайди. У ўзининг севимли итлари билан вақт ўтказиши, подкастлар тинглаши ва кечқурун овқат пишириши мумкин бўлган уйидаги қулайликни афзал кўради. Клублар ва кечалар кундалик ҳаётининг бир қисми эмас.

Дишани истеъдодли актриса бўлиш орзусига интилмоқда, лекин айни пайтда оддий ва уй шароитидаги машғулотлардан қувонч ва роҳат топади. Камтарона турмуш тарзи уни ўзига хос қилиб, ижтимоий элита орасидан ажратиб туради.

Ахлат қутисига ташлаб кетилган қизни Ҳиндистонда фақат битта нарса кутарди: қашшоқлик, очлик ва уйсиз ҳаёт. Дишанига омад кулиб боқди, унга машҳур оиланинг аъзоси бўлиш насиб этди.

Дишани меҳрибон ота-оналар томонидан ўстирилган нозик гулга ўхшайди. У меҳрибонлик, меҳнатсеварлик, ақл-заковат ва ажойиб гўзаллик намунасига айланди. У асраб олган ота-онасининг юзини ерга қаратмади. Улар қизи шундай ажойиб, олижаноб инсон бўлиб етишганидан фахрланишади. “Замин” янгиликларини “Telegram”да кузатиб боринг