АҚШда Эрон буюртмаси асосида Трампни ўлдиришни режалаштирган эркак қўлга олинди

^{Фото: newsweek.com}
АҚШда Эрон билан алоқа қилиб, буюртма асосида Республикачилар партиясидан президентликка номзод Дональд Трампга суиқасд уюштиришга уринган покистонлик эркак ҳибсга олинган. Бу ҳақда Al Arabiya нашри Ғарб манбаларига таяниб, хабар берди.

6 август куни АҚШ Адлия вазирлиги эркак ҳибсда эканлигини ва унинг устидан суд жараёни бошланишини маълум қилган. Покистонлик эркак Трампдан ташқари яна кўплаб америкалик сиёсатчи ва ҳукумат амалдорларига ҳам суиқасд уюштиришни мақсад қилган.

Тўпланган далилларга кўра, 46 ёшли Осиф Раза Мерчант 2020 йилда Эрон Ислом инқилоби муҳофизлари корпуси (IRGS) олий қўмондони Қосим Сулаймоннинг АҚШ томонидан ўлдирилиши оқибатида қасос олиш учун АҚШга келган. Бу ерда у жиноий гуруҳ ёллашга киришган.

Америкалик прокурорлар Осиф Раза Америка Қўшма Штатларига кириб келишдан олдин Эронда бўлганини аниқлаган. У, шунингдек, Нью Йоркнинг Бруклин округида буюртма орқали бир фуқарони ўлдиришда ҳам айбланмоқда.

“Йиллар давомида Адлия вазирлиги Эрон генерали Сулаймонийнинг ўлдирилиши учун Америка давлат амалдорларидан ўч олиш бўйича Эроннинг қўпол ва тинимсиз ҳаракатларига қарши агрессив тарзда кураш олиб бормоқда”, дея ҳолатга муносабат билдирган Бруклин округи бош прокурори Меррик Гарланд.

Ҳибсга олинган шахсни сўроқ қилган расмийлар берган маълумотга қараганда, Сулаймонийга ҳужумни маъқуллаган собиқ президент Дональд Трамп ҳамда бошқа амалдаги ва собиқ ҳукумат амалдорлари жиноий уюшманинг нишонлари бўлган. Гуруҳ ҳозирга қадар қандай ҳаракатлар содир этгани ва АҚШда қанча аъзолари борлиги номаълум.

Адлия вазирлиги матбуот котиби тергов ва суд жараёнлари юзасидан қўшимча изоҳ беришдан бош тортган. Трампнинг президентлик кампаниясидан ҳам ҳолат бўйича муносабат олишнинг имкони бўлмаган. “Замин” янгиликларини “Facebook”да кузатиб боринг