Илон Маск Х тармоғини бойкот қилаётган компанияларга қарши уруш эълон қилди

^{Фото: “РБК”}
Миллиардер Илон Маск ўзининг Х ижтимоий тармоғини бойкот қилаётган компанияларга қарши уруш эълон қилди. Бу ҳақда Global USA News нашри маълум қилди.

Миллиардер ижтимоий тармоғига бойкот эълон қилган компаниялар устидан даставвал шикоят қилмагани, балки вазият изга тушишини кутганини айтган. Аммо бундай компаниялар сони орта бошлаши табиий равишда Х бошқарув раҳбариятини ташвишга солган.

"Биз икки йил давомида тинчлик ўрнатишга ҳаракат қилиб келдик. Аммо энди чинакамига уруш бошланди", деб ёзган Илон Маск Х’даги саҳифасида.

Ижтимоий тармоқ бош директори Линда Лаккарино Global Alliance for Responsible Media (GARM), Mars, Unilever каби компаниялар, шунингдек, World Federation of Advertisers (WFA) бирлашмалари устидан монополия иши бўйича даъво киритилганини маълум қилган. Ушбу ташкилотлар ноқонуний тарзда Х’ни бойкот қилишга уринган ҳамда тармоққа реклама беришни тўхтатган.

Линда Лаккарино, ушбу ташкилотлар ва улар раҳбариятининг “ноқонуний ҳаракатлари” Х тармоғига миллиард долларлик зарар олиб келганини айтган. Эндиликда эса компания зарарни қоплаш ва бойкотни ечиш ҳаракатига тушган.

Аввалроқ АҚШдаги Walt Disney, Apple ва Sony Pictures каби компаниялар ҳам Х’га реклама беришни тўхтатган эди. Бунга сабаб сифатида эса Илон Маскнинг тармоқда компаниялар фаолиятини таҳқирловчи постлар қолдиргани келтирилган.

Миллардер ўзига қарши бўлган компанияларнинг барчасига нисбатан қонуний чора кўришга ваъда берган. Суд ишида ютиб чиқиш ва зарарни қоплаш учун бор диққат-эътиборини қаратиши маълум қилинган. “Замин” янгиликларини “Youtube”да кузатиб боринг