Россияда кунига 30 нафардан ортиқ ҳарбий армиядан қочаётгани айтилди

^{Фото: ТАСС}
Россия ҳарбий судлари 2024 йил бошидан бери хизмат жойини ўзбошимчалик билан ташлаб кетишга боғлиқ 5204 та ишни қабул қилди. Бу 2023 йил давомида қайд этилган барча ҳолатлардан кўп — ўтган йили инстанцияларга бундай ишларнинг 5096 таси келиб тушган.

Таъкидланишича, кўрсаткичлар рекорд тезликда ортмоқда ва 2022 йил билан таққослаганда ўн баробарга ошган. Майдан бери судларга ҳар ой хизматдан бўйин товлаш билан боғлиқ ўртача 950 та иш келиб тушмоқда, бу кунига 30 дан ортиқ дегани.

Буюк Британия Мудофаа вазирлиги разведкасига кўра, охирги уч ой Россия армияси учун уруш бошланганидан бери энг қақшаткич кечган. Май—июнь ойларида 70 мингга яқин ҳарбий ҳалок бўлган ва яраланган, июлда эса ушбу кўрсаткич кунига 1100 кишидан ошган. Августдаги йўқотишлари ҳам суткасига 1000 нафар аскардан кам бўлмаслиги айтилмоқда.

Нашрнинг қайд этишича, Украинага қарши кенг кўламли уруш бошланганидан бери 10 мингдан ортиқ россиялик хизматдан бўйин тўвлагани учун жиноий жавобгарликка тортилган. Ушбу статистикага нафақат ўзбошимчалик билан хизмат жойини тарк этганлар, балки буйруқни бажармаган ҳарбийлар, шунингдек, дезертирлар ҳам киритилган. Июнь ўрталарида уларнинг 8594 нафари судланган.

Бундай ишларни кўриб чиқиш тезлиги ойига 800 тани ёки бир иш кунида тахминан 40 та қарорни ташкил қилади. Судлар асосан шартли жазо тайинлаётгани сабаб қўмондонликда ҳарбий хизматчиларни Украинадаги фронтга юбориш имконияти мавжуд. Россияда жами 100 та гарнизон ва 9 та округ/флот ҳарбий судлари фаолият олиб боради.

Ҳозирда ҳарбий қисмни ўзбошимчалик билан тарк этишнинг ҳар қандай тури сафарбарлик даврида содир этилган жиноят сифатида баҳоланмоқда. Мазкур ҳолатлар ва бошқа «ҳарбий» моддалар учун белгиланган жазо 2022 йил 21 сентябрда Россия президенти Владимир Путин эълон қилган оммавий сафарбарлик вақтида кучайтирилган. Суд ҳукмларини таҳлил қилган «Медиазона»га кўра, судланувчиларнинг асосий қисми айнан сафарбарликка жалб этилганлардир. “Замин” янгиликларини “Telegram”да кузатиб боринг