Рамзан Қодиров пулемёт ўрнатилган Cybertruck’ни синовдан ўтказди (видео)

^{Фото: Видеодан кадр}
Чеченистон раҳбари Рамзан Қодиров миллиардер Илон Маскдан Cybertruck электро-пикапини олгани ва у уруш зонасидаги жангчиларга юборилишини айтди. Бу ҳақда у ўзининг Telegram каналида хабар берди.

Рамзан Қодиров Cybertruck’га пулемёт ўрнатган ҳолда уни шахсан синовдан ўтказган.

“Мен янги техникани мамнуният билан синаб кўрдим ва уни ‘Кибер йиртқич’ деб аташлари бежиз эмаслигига ишонч ҳосил қилдим. Ҳақиқатан енгилмас ва чаққон ҳайвон. Манёврли автомобиль, тезликка эришади ва тўсиқларни осонлик билан енгиб ўтади. Жуда қулай машина экан. Шундай ажойиб хусусиятларга эга бўлгани учун, кибертрак яқин орада махсус ҳарбий операция зонасига жўнатилади ва у ерда тегишли шароитларда фойдаланилади. Ишончим комилки, бу ‘йиртқич’ жангчиларимизга катта фойда келтиради.

Илон Маскка самимий миннатдорлик билдираман! Бу, албатта, замонамизнинг энг кучли даҳоси ва мутахассиси. Буюк инсон! Кибертрак эса катта лойиҳа бўлиб чиқди. Шубҳасиз, дунёдаги энг яхши автомобиллардан бири! Мен бу машинани том маънода севиб қолдим”, дейди Қодиров.

Шунингдек, Чеченистон раҳбари Илон Маскка миннатдорлик билдириб, уни Грознийга таклиф қилди.

“Грознийга келинг, сизни энг қадрли меҳмонимдай кутиб оламан! Россия Ташқи ишлар вазирлигидагилар бундай ташрифга қарши бўлмаслар деб ўйлайман. Ва, албатта, ‘махсус ҳарбий операция’ни якунлашга кўмаклашадиган янги ишланмаларингизни интизорлик билан кутиб қоламиз”, дейди у. “Замин” янгиликларини “Telegram”да кузатиб боринг