Россияда 7 магнитудали зилзиладан кейин Шивелуч вулқони уйғонди

^{Фото: Фанлар академияси Узоқ Шарқ вулқоншунослик ва сейсмология институти}
Россиянинг Камчатка яриморолида уйғонган Шивелуч вулқонининг кули денгиз сатҳидан 8 километр баландликка қадар кўтарилди. Бу ҳақда Фанлар академияси Узоқ Шарқ вулқоншунослик ва сейсмология институти хабар берди.

Қайд этилишича, вулқондан отилган куллар жануби-шарқий йўналишда 492 километрга чўзилган, авиахавфнинг «қизил код» даражаси эълон қилинган (бу вулқондан атмосферага кўп миқдорда кул чиқаётганини билдиради). «Вулқон фаоллиги маҳаллий ва халқаро авиаташувлар учун хавф туғдиради», — дейилади институт хабарида.

Шивелуч — Камчаткадаги энг шимолий фаол вулқон бўлиб, Уст-Камчатский туманидаги Ключи қишлоғидан 45 километр узоқликда жойлашган. У ерда 5 мингга яқин аҳоли яшайди. Туман раҳбари Олег Бондаренконинг маълум қилишича, Уст-Камчатскийда «1 миллиметр қалинликда кул тушиши кузатилган» ва у аҳолига кўчага чиққанда ҳимоя воситаларидан фойдаланишни тавсия қилди.

Вулқон Камчаткада 7 магнитудали зилзила содир бўлганидан кейин ҳаракатга келган. Ер ости силкинишининг эпицентри Петропавловск-Камчаткадан 108 километр жануби-шарқда, Тинч океани ҳудудида жойлашган. «Шаҳарнинг ўзида 6 балли ер ости силкинишлари кузатилди», — дейди губернатор Владимир Солодов.

Янгиликлар