![Россия Украинадаги фронтдан 5000 ҳарбий хизматчини Курскка ўтказди](/uploads/posts/2024-08/x68b67400f5_gvexobbyuqotkzlhydopnrlzvpbdwg9s.webp.pagespeed.ic.czAauriTbH.webp)
Фото: Россия Мудофаа вазирлиги
Ўтган ҳафтанинг ўрталарига келиб Россия Украина Қуролли кучлари (УҚК) ҳужуми фонида Курск вилоятини ҳимоя қилиш учун Украинадаги фронтдан 5000 нафаргача ҳарбий хизматчини жўнатди. Бу ҳақда 17 август куни The Wall Street Journal (WSJ) хабар берди.
Унинг маълумотларига кўра, Россия Федерацияси асосий ҳужумкор кучлари тўпланган Донецк вилоятидан фақат битта бригада олиб чиқилган, қолганлари эса - фронтнинг унчалик муҳим бўлмаган ҳудудларидан.
Шу билан бирга, нашр суҳбатдоши Украина Қуролли кучларини Курск вилоятидан чиқариб юбориш учун Москвага 20 мингдан ортиқ яхши тайёрланган аскар керак бўлиши мумкин, деган фикрни билдирди.
WSJ: Украина Курскка 6 минг аскар юборди
Ўз навбатида, Ғарб ҳисоб-китобларига кўра, Украина ҳужумни қўллаб-қувватлаш учун Курскка 6 минггача ва Суми вилоятига яна 4 минггача аскар юборган. WSJ манбасининг аниқлик киритишича, фронт чизиғини заифлаштирмаслик учун қўшинлар муҳим қисми захирадан чиқарилган.
Украина радиоэлектрон кураш бўлинмалари рус техникасига халақит бериш ва ҳарбийларнинг Украина позицияларини аниқлашлари ёки алоқаларни ушлаб қолишига йўл қўймаслик учун асосий механизациялашган ҳужум кучларидан олдин Россия ҳудудига ўтган, деб ёзади нашр.
WSJ таъкидлашича, бу ноодатий жойлашув Украина ҳужумкор кучлари атрофида «ҳимоя пуфаги» яратди. Ҳужумга Американинг Stryker зирҳли жанговар машиналари ва Германиянинг Marder пиёда жанговар машиналари билан жиҳозланган Украинанинг энг кучли бўлинмаларидан бири бўлган 80- ва 82-десантчилар бригадалари бошчилик қилди.
Украиналик дрон операторларидан бирининг сўзларига кўра, рус зирҳли машиналари кам бўлган, чунки улар шимолга тортилган ва Украина ҳужумкор қўшинлари тезда Россия ҳудудига чуқур кириб боришга муваффақ бўлишган.
АҚШ Россиядаги нишонлар ҳақида Киевга разведка маълумотларини бермаяпти
Операцияга тайёргарлик шу йилнинг ёзи бошида, Украина Қуролли кучлари Курск инфратузилмасига, жумладан электр тармоқлари, ўқ-дорилар ва ёнилғи омборлари ҳамда видеокузатув ускуналарига ҳужум қилиш учун дронлардан фойдаланган пайтда бошланган эди.
Алоҳида чегара рейдлари Украина разведкаси кўмагида амалга оширилди. Нашрнинг қайд этишича, амалиёт бошланишидан икки ҳафта олдин Украина дронлари Курск йўлидаги чегара постида Россия кузатув тизимларини йўқ қилган. Махфийлик нуқтайи назаридан, кўплаб бўлинмалар деярли операция бошлангунга қадар ҳужумдаги иштироки ҳақида билмаган.
АҚШ президенти Жо Байден маъмурияти ҳам Украина Қуролли кучларининг режалари ҳақида олдиндан хабардор этилмаганини даъво қилди. Вашингтон Киевга Россия ҳудудига зарбалар бериш учун АҚШ томонидан тақдим этилган ATACMS узоқ масофали тактик баллистик ракеталардан фойдаланишни тақиқлади.
Бундан ташқари, АҚШ Россия Федерацияси ичидаги нишонлар ҳақидаги разведка маълумотларини Украинага бермаяпти, чунки Москва уни ҳужум операциясида шерик деб билишини истамайди, деди WSJ’га берган интервюсида юқори мартабали америкалик амалдор.
CNN: Россия Ленинград ҳарбий округи ва Калининграддан ҳарбий хизматчиларни минтақага юборди
Россия Қуролли кучлари Украинанинг Курск вилоятидаги ҳужумига қарамай, Украина шимоли-шарқи ва жанубида, хусусан Запорижжяда «фаол жанговар операцияларни» давом эттирмоқда. Бу ҳақда 15 август куни Оқ уй Миллий хавфсизлик кенгашининг (МХК) стратегик алоқалар бўйича координатори Жон Кирби CNN телеканалига маълум қилди.
«Бизга аёнки, (Россия президенти Владимир) Путин ва россиялик ҳарбийлар баъзи ресурсларни, айрим бўлинмаларни Курск вилоятига ўтказмоқда», - дея таъкидлади Кирби. Бироқ, бу Кремл Украина шимоли-шарқи ва жанубидаги фронтларда операциялардан воз кечганини англатмайди, деди у.
Ғарб разведкаси маълумотлари билан таниш бўлган бошқа икки манбага кўра, Россия Украинадан Курскка каттароқ, яхши тайёрланган бўлинмаларни кўчиришни режалаштирмаяпти. Суҳбатдошлардан бирининг сўзларига кўра, Москва Курск мудофаасини асосан Россия бошқа минтақаларидан келган, тайёргарликдан ўтмаган ҳарбий хизматчилар ҳисобига кучайтираётган кўринади. Россия Федерацияси, шунингдек, Ленинград ҳарбий округи ва Калининград ҳарбийларини минтақага юборди, дея аниқлик киритди CNN.
Британиянинг The Economist нашри ўз манбаларига таяниб, 11 август куни Россия қўшинларини Харкив фронтидан Курск вилоятига ўтказгани, бироқ асосий Донбасс йўналишидан у ерга Киев кутганидан анча кам куч юборилгани ҳақида хабар берди.
Украина Курск вилоятидаги яна бир кўприкни вайрон қилди
6 август куни Украина Қуролли кучлари Курск вилоятида кенг кўламли ҳужум операциясини бошлади. Иккинчи жаҳон уруши тугаганидан кейин биринчи марта хорижий қуролли кучлар Россия Федерацияси ҳудудининг бир қисмини эгаллаб олди. 9 август куни Россия ҳукумати Белгород, Брянск ва Курск вилоятларида «аксилтеррор операцияси режими»ни жорий этди.
Украина Қуролли кучлари Ҳаво кучлари қўмондони генерал-лейтенант Николай Олешчук 18 август куни Украина қўшинлари Курск вилоятидаги ҳужум пайтида Званное қишлоғидаги Сейм дарёси устидаги стратегик аҳамиятга эга бўлган кўприкни вайрон этганини маълум қилди. У Россия армияси учун катта аҳамиятга эга эди. «Замин» янгиликларини «Вконтакти»да кузатиб боринг
Ctrl
Enter
Хато топдИнгизми?
Иборани ажратиб Ctrl+Enter тугмасини босингМавзуга оид янгиликлар
![Ўзбекистонликлар Латвияга ишга таклиф қилинмоқда расм](/uploads/posts/2024-08/xee9ba799f5_photo_2024-08-17_21-21-38-svocqjqq.webp.pagespeed.ic.4sAS-FVBhb.webp)
Ўзбекистонликлар Латвияга ишга таклиф қилинмоқда
![Алаудинов: Украина ҚК Курск вилоятида фаол таслим бўла бошлади расм](/uploads/posts/2024-08/x47eefc7a20_45208258_00768432_1280x0_80_0_0_078a940b7db8f5d7769e11ed3c8a47c2_jpg.webp.pagespeed.ic.PW8hJNb5v4.webp)
Алаудинов: Украина ҚК Курск вилоятида фаол таслим бўла бошлади
![Саудия Суперкубоги. "Ал-Ҳилол" финалда "Ан-Насср"ни тор-мор этди расм](/uploads/posts/2024-08/x3be71494cc_photo_2024-08-17_23-18-07-0wigkscv.webp.pagespeed.ic.WDKxIySxlY.webp)
Саудия Суперкубоги. "Ал-Ҳилол" финалда "Ан-Насср"ни тор-мор этди
![Украина Россиядаги 4 та аэродром нишонга олинганини маълум қилди расм](/uploads/posts/2024-08/x92d3c3f176_fa3rep90edrbbinxhtni3yktne9gsdq1.webp.pagespeed.ic.mNbBQrAxfG.webp)
Украина Россиядаги 4 та аэродром нишонга олинганини маълум қилди
![Эрон президенти мамлакат оғир иқтисодий аҳволда эканини маълум қилди расм](/uploads/posts/2024-08/x450c1d28c5_n7d9mwcg4cf_vbpithltiigcpkcots7y.webp.pagespeed.ic.074bxrxt4U.webp)
Эрон президенти мамлакат оғир иқтисодий аҳволда эканини маълум қилди
![Бундесвер генерали: Украина Россияни мағлуб этишга қодир расм](/uploads/posts/2024-08/x63e75a66b4_h-bn997qzm7vk0kogejaaqu3-to2idpj.webp.pagespeed.ic.bbMytTm_0o.webp)
Бундесвер генерали: Украина Россияни мағлуб этишга қодир
![ОФК Элит Чемпионлар Лигаси. “Пахтакор”нинг гуруҳ босқичидаги рақиблари маълум бўлди расм](/uploads/posts/2024-08/x2655a76327_66bf1bc847dcf.webp.pagespeed.ic.0L7XEgNGKw.webp)
ОФК Элит Чемпионлар Лигаси. “Пахтакор”нинг гуруҳ босқичидаги рақиблари маълум бўлди
![Аббосбек Файзуллаев Москвада яшаш харажатлари қимматлигини айтди расм](/uploads/posts/2024-08/xddf59dbde0_3312-_jrda7jv.webp.pagespeed.ic.-YTiJ-021c.webp)
Аббосбек Файзуллаев Москвада яшаш харажатлари қимматлигини айтди