Британия ҳукумати давлат бюджетида “қора туйнуклар” аниқлади

^{Фото: “creditstrategy.co.uk”}
Буюк Британия ҳукумати 22 миллиард фунт стерлинглик давлат бюджетида жиддий иқтисодий ва ижтимоий муаммоларнинг “мерос”и бўлган “қора туйнуклар”ни аниқлади. Бу ҳақда мамлакат бош вазири Кир Стармер хабар берди.

Унинг сўзларига кўра, охирги уч ойда ҳукумат қарзи 5 миллиард фунт стерлингга ошган. Стармернинг таъкидлашича, мамлакатдаги тартибсизликлар сўнгги ўн йилликлардаги муваффақиятсиз сиёсатлар натижаси бўлган вандализм, ирқчилик ва зўравонлик каби жамиятдаги жиддий муаммоларни аниқлаган.

Натижада, бош вазир октябрь ойида “оғриқли” бюджет тақдим этилиши ҳақида огоҳлантирган. У солиқ юкини мамлакат фуқаролари ва резидентлари ўртасида адолатли тақсимлаш зарурлигини таъкидлаган.

Стармернинг қўшимча қилишича, мамлакат осон ечимлар сиёсатига чек қўйиб, хатоларни тузатишга, жумладан, янги қамоқхоналар қуришга эътибор қаратиши керак.

Аввалроқ Буюк Британияда мусулмонларга қарши намойиш уюштирган фуқаролар ҳаракати полиция иштирокидаги оммавий тўқнашувларга айланиб кетгани хабар берилган эди.

Манбада айтилишича, кескинлик 29 июль куни Саутпорт шаҳрида юз берган қотиллик оқибатида келиб чиққан. Ўшанда шаҳарчада ўтказилган концерт пайтида номаълум ўспирин жиноят содир этиб, уч нафар болани пичоқлаб ўлдирган, яна беш нафар бола оғир жароҳат билан касалхонага олиб кетилган.

Саутпорт аҳолиси қотилликда мусулмон жамоасидан гумон қилган. Ўлдирилган болаларнинг қариндошлари ҳамда уларга қўшилганлар иштирокидаги норозилик ҳаракатлари тартибсизликларга айланиб кетган. “Замин” янгиликларини “Telegram”да кузатиб боринг