КХДР ҳарбийларини Россияга юбориш ҳақидаги хабарларга илк бор муносабат билдирди

^{Фото: Reuters}
КХДРнинг БМТдаги миссияси Шимолий Корея аскарларини Россияга юбориш ҳақидаги маълумотни асоссиз миш-мишлар деб атади.

Шимолий Корея делегацияси раҳбари, шунингдек, Россия билан муносабатлар “қонуний ва ҳамкорликка асосланган” эканини айтган.

“Россия билан ҳарбий ҳамкорлик масаласига келсак, менинг делегациям мақсади КХДРни қоралаш ва икки давлат ўртасидаги қонуний, дўстона ва шериклик муносабатларига путур етказиш бўлган бундай асоссиз стереотип миш-мишларга изоҳ беришни зарур деб билмайди”, деди Шимолий Корея миссияси вакили Нью Йоркда Бош ассамблеянинг қуролсизланиш ва халқаро хавфсизлик бўйича йиғилишда.

Yonhap нашрига кўра, бу Шимолий Корея томонининг биринчи расмий изоҳидир. Ушбу баёнот Жанубий Корея разведкасининг 1,5 минг нафар шимолий кореялик аскар Узоқ Шарқдаги Россия полигонларида эканлиги ҳақидаги хабарлар фонида эълон қилинди. Жанубий Корея департаменти келажакда ҳарбийлар Украинадаги можаро зонасига юборилиши мумкинлигини истисно қилмаган.

Жанубий Корея разведкаси матбуот хизматига кўра, Шимолий Кореянинг 1 500 нафар аскари аллақачон Узоқ Шарқдаги Россия полигонларида бўлиб, у ердан Украинага жўнаб кетишлари кутилаётгани хабар берилган.

Хусусан, разведка маълумотларига кўра, Шимолий Корея ҳарбий хизматчилари Владивосток, Уссурийск, Хабаровск ва Благовешенскда жойлашган бўлиб, уларга рус кийим-кечаклари ва Россиянинг қалбаки ҳужжатлари берилган.

Узоқ Шарқдаги россиялик ҳарбий манба BBC’га мазкур маълумотларни тасдиқлаган. У, шунингдек, Шимолий Корея ҳарбийларининг бир қисми аллақачон етиб борганини ва Уссурийск яқинидаги ҳарбий базаларга жойлашганини маълум қилган. “Замин” янгиликларини “Youtube”да кузатиб боринг