Шолц Зеленскийнинг НАТОга таклиф қилиш ҳақидаги илтимосини рад этди

^{Фото: Christoph Soeder/dpa/picture alliance}
Германия канцлери Олаф Шолц Украина президенти Володимир Зеленскийнинг Украинани НАТОга зудлик билан таклиф қилиш ҳақидаги илтимосини рад этди. Бу ҳақда Шолцнинг ўзи 24 октябр, пайшанба куни ZDF нашрига берган интервюсида айтиб ўтди.

Шолц НАТО мамлакатлари Украина учун «истиқболларни тасвирлаб берганини» эслатди. «Ўйлайманки, ҳозирги вақтда янги ечимга эҳтиёж йўқ», деди Шолц. Канцлернинг сўзларига кўра, «уруш ҳолатидаги давлат НАТОга аъзо бўла олмаслигини» аниқ айтиш керак. «Буни ҳамма билади, бу борада ҳеч қандай келишмовчилик йўқ», — дея қўшимча қилди у. Айни пайтда Украинага НАТОга аъзо бўлиш таклифи кутилмайди, чунки алянс мисолида «таклиф одатда аъзолик билан жуда тез боғланади», дея қўшимча қилди Шолц.

Зеленский: Украина ядро қуролини қайтаришни сўрамаяпти, лекин НАТОга қўшилиши керак

Украина ядро қуролини қайтаришни сўрамаяпти, лекин Россия агрессиясидан ўзини ҳимоя қила олиш учун НАТОга қўшилиши керак. Бу ҳақда Украина президенти Володимир Зеленский АҚШ мудофаа вазири Ллойд Остин билан музокаралар якунлари бўйича журналистларга маълум қилди.

Зеленскийнинг таъкидлашича, Украина кўп йиллар аввал НАТОга аъзо бўлишга умид қилиб, бутун ядро арсеналидан воз кечган.

«Биз ўз вақтида барча ядровий қуролларимиздан воз кечдик. Бу кўп йиллар олдин бўлганди. Биз НАТОга киришимиз керак эди. Бу менинг фикрим. Мен буни (АҚШ президенти Жо) Байден ва (Республикачилардан президентликка номзод) Трамп билан бўлишдим. Шунинг учун мен Украинага нисбатан адолат қаердалигини тушуна олмаслигимни айтдим», — дея Зеленскийнинг сўзларидан иқтибос келтирган РБК-Украина.

Унинг таъкидлашича, Украина қуроллардан воз кечган, аммо ваъда қилинган хавфсизликни олмаган.

«Биз ядро қуролидан воз кечдик, лекин НАТОни олмадик. Ва сиз менга бошқа иттифоқчилар ёки бошқа «хавфсизлик соябонлари» ёки шунга ўхшаш нарсаларни айтиб бера оласизми, деб сўрадим. Ҳеч ким Украина учун НАТОга мос келадиган хавфсизлик чоралари ва кафолатлари ҳақида менга айтолмади. Шунинг учун бу менинг далилларим», — деди Зеленский. «Замин»ни Telegram’да ўқинг!